Өрөбүл күннэргэ -8С кыраадыска диэри сылыйыы буолуоҕа

Бу нэдиэлэ бүтүүтэ Саха сирин синоптиктара үгүс оройуоннарынан күн-дьыл уларыйа турарын сылыктыыллар.

Арҕаа уонна киин оройуоннарынан Сибиир антициклонун күүһүнэн -38С кыраадыска диэри тымныйар. Онтон соҕуруулуу-арҕаа оройуоннарга -8С кыраадыска тиийэ халлаан нуорматтан сылаас буолуоҕа.

Саха сиринээҕи УГМС метеорологическай уонна агрометеорологическай прогнозтарга отделын начаалынньыга Саргылаана Никитина этэринэн, өрөбүллэргэ халлаан нуорматтан сылаас буолуо. Салгын температурата үгүс оройуоннарынан былыттаах буолан үрдүөҕэ.

«Олунньу 21 күнүгэр соҕуруулуу-арҕаа Сибииртэн салгын маассата кэлэн, өрөспүүбүлүкэ хотугулуу-арҕаа өттүгэр, арҕаа оройуоннарынан -15…-20С кыраадыска тиийэ нуорматтан сылыйара күүтүллэр, оттон өрөбүллэргэ, олунньу 22-23 күннэригэр, соҕуруулуу-арҕаа оройуоннарга -8…-13С, киин улуустарга -17…-22С кыраадыс буолара күүтүллэр. Түүн быһа холоон -30С кыраадыс буолуо», — диэн Саргылаана Никитина эбэн эттэ.