Өрөбүлгүтүн «Үрдэл» пааркаҕа атаарыҥ

Саас кэлэн күммүт уота сандааран, сибиэһэй салгыҥҥа сылдьарга, сынньанарга тоҕостоох күн үүннэ. Өрөбүлгэ ханна баран сынньаныахха сөбүй? Бүгүн «Үрдэл» паарка сибиэһэй салгыҥҥа сынньана кэлэргэ ыҥырар.

«Үрдэл» пааркаҕа дьон сынньанарыгар аналлаах араас оонньуу-көр дэлэгэй. Араас уһун-кылгас да, үрдүк-намыһах да сыыртан «ледянканан» эбэтэр «тюбинынан» түһүөххэ, бурааҥҥа холбоммут «банаанынан» хатааһылыаххытын, табаҕа олорсуоххутун сөп. Уран тарбахтаах уустар маһынан оҥорбут оҥоһуктарын уонна динозаврдар аллеяларынан сибиэһэй салгыҥҥа астына-дуоһуйа хаамсыаххыт. Дьокуускай саамай үрдүк туочукатыттан куораты көрүөххүтүн сөп. Сибиэһэй салгыҥҥа сылдьан аччыктаатаххытына, эһигини «Sylaas» кафе минньигэс аһынан көрсүө.

Үлэ күнүгэр сынньанар сиргэ аттракционнарга киирии уонна арт-эбийиэктэри көрүү: улахан киһиэхэ 250 солк., оҕоҕо – 200 солк., массыына тохтобула 500 солк.

Өрөбүл күн аттракционнарга киирии уонна арт-эбийиэктэри көрүү: улахан киһиэхэ 300 солк., оҕоҕо – 250 солк., массыына тохтобула 500 солк.

Оттон төрөөбүт күннээх киһиэхэ, 5-гэр диэри саастаах оҕоҕо уонна доруобуйатынан хааччахтаах дьоҥҥо киирии босхо.

Пенсионердарга, элбэх оҕолоох дьиэ кэргэҥҥэ уонна устудьуоннарга 50% чэпчэтии көрүллэр.