Өрөбүллэргэ +15°С кыраадыска диэри сылыйыа

Саха сиригэр бу өрөбүллэргэ хотугулуу-арҕаа оройуоннарынан хаардыыр, киин улуустарынан сөҥүүтэ суох, соҕуруу ардыыр, күнүс +15°С кыраадыска диэри сылыйар.

Бу туһунан УГМС саайта иһитиннэрэр. Өрөспүүбүлүкэ хотугулуу-илин оройуоннарыгар, соҕуруулуу-илин, киин улуустарынан сөҥүүтэ суох, хотугулуу-арҕаа хаардыыр, соҕуруу, соҕуруулуу-арҕаа инчэҕэй хаар түһэр, сорох сиринэн ардыыр. Кыра тыаллаах, хоту муора кытылынан сөкүүндэҕэ 17-22 м. түргэннээх күүстээх тыаллаах. Муус устар 26 күнүгэр соҕуруу сөкүүндэҕэ  15 м. түргэннээх тыаллаах.

Салгын температурата түүн 0,-5°, халыннаҕына -8-13°, хотугулуу-арҕаа, Халыма-Индигиир улуустарынан -13-18°. Күнүс салгын температурата киин улуустарынан, хотугулуу-илин +8+13°, соҕуруу, соҕуруулуу-илин +10+15°, арҕаа +1+6°, хотугулуу-арҕаа, Халымаҕа -3,+2°, хоту муора кытылынан -8-13° кыраадыс тымныы.

Дьокуускайга салгын температурата түүн 0,-1°, күнүс +3+8° кыраадыс сылаас, сөҥүүтэ суох. Хотуттан сөкүүндэҕэ  5-6 м. түргэннээх тыаллаах.