Өрөбүллэргэ икки массыына муус анныгар түстэ

Ааспыт өрөбүллэргэ муус анныгар икки массыына түстэ. Өрүс суолунан сырыы бобуллубутун үрдүнэн, дьон мууһунан айанныырын тохтоппот диэн СӨ Быыһыыр сулууспатын пресс-сулууспата иһитиннэрэр.

Муус устар 20 күнүгэр Быыһыыр сулууспаҕа 112 нүөмэр нөҥүө эрийэннэр, ГРЭС оройуонун диэки мууска массыына хаайтарыбытын туһунан иһитиннэрбиттэр. Массыынаҕа үс киһи, ол иһигэр оҕо баар эбит. Эмсэҕэлээччилэр массыына кырыыһатыгар тахсыбыттар. Быыһааччылар быһылаан буолбут сиригэр айаннаан истэхтэринэ эрийэн аккаастаабыттар, атын дьон номнуо көмөлөспүт.

Нам улууһугар Сангаар чугаһыгар муус анныгар «УАЗ-Патриот» массыына түспүт. Суоппар тахсаатын кытта, массыыната тута уунан туолбут. Түбэтээҕи быыһыыр-көрдүүр этэрээккэ эрийэн, быыһааччылар айаҥҥа туруммуттар. Массыынаны лебедканан таһаарбыттар, эмсэҕэлээччини эвакуациялаабыттар.

Быыһыыр сулууспа тиэхиньикэ муус анныгар баран дьон өлүүтүгэр тиэрдиэн сөбүн, онон өрүс суолунан айанныыртан туттунарга ыҥырар. Дьокуускай-Аллараа Бэстээх хайысханан салгын сыттыктаах суудуналар айанныылларын санатабыт.