Өрөбүллэргэ күнүс -10°С кыраадыс тымныы буолара күүтүллэр

Өрөбүллэргэ, кулун тутар 29-30 күннэригэр, Саха сиригэр УГМС дааннайынан сорох оройуоннарынан хаардыыр, салгын температурата түүн -25°, күнүс -8° кыраадыс буолара күүтүллэр.

Өрөспүүбүлүкэҕэ соҕуруу, хотугулуу-арҕаа улуустарынан, илин, арҕаа оройуоннарынан кыралаан хаар түһэр, сорох оройуоннарынан хаардыыр. Халымаҕа хаар түһэр, сорох сиринэн күүстээх хаар түһэрэ сабаҕаланар. Арктика кытылынан тибиилээх уонна Халымаҕа сөкүүндэҕэ 9-14 м. түргэннээх тыаллаах.

Салгын температурата түүн -20-25°, халыннаҕына -28-33°, арҕаа хаар түһэригэр уонна Халымаҕа  -12-17°, хоту сорох оройуоннарынан -33-38°, күнүс салгын температурата -3-8°, соҕуруулуу-арҕаа -1,+4°, илин, хоту улуустарынан -12-17° кыраадыс тымныы.

Дьокуускайга субуотаҕа, кулун тутар 29 күнүгэр, түүн -18-22° тымныы, күнүс -10-12° кыраадыс. Былыттаах, сөҥүүтэ суох, арҕааттан сөкүүндэҕэ 2-3 м. түргэннээх тыаллаах.

Кулун тутар 30 күнүгэр былыттаах, сөҥүүтэ суох, соҕуруулуу-арҕааттан сөкүүндэҕэ 1-2 м. түргэннээх тыаллаах, салгын температурата түүн -18-20°, күнүс -8-10° кыраадыс тымныы.