Өрөбүллэргэ олохтоохтор түөкүттэргэ икки мөлүйүөнтэн тахса солкуобайы ыыппыттар

Ааспыт өрөбүл күннэргэ Саха сиринээҕи  ИДьМ сулууспата эдэр дьон сиэртибэ буолбут түөрт саҥа кибер-түөкүннээһин түбэлтэтин бэлиэтээтэ. Хоромньу уопсай суумата 2 092 000 солкуобайга тэҥнэстэ.

Бастакы сиэртибэнэн Дьокуускайтан сылдьар 25 саастаах биригэдьиир буолла, кини 600 тыһыынча солкуобайын сүтэрдэ. Киниэхэ мессенджер нөҥүө Киин Баан үлэһитинэн сымыйанан эрийэн, мунньуммут харчытын куттала суох счетка көһөрөргө итэҕэппиттэр. Билиҥҥи туругунан холуобунай дьыала тэрилиннэ. ИДьМ сулууспата санатарынан, Киин Баан чааһынай дьоннору кытта үлэлээбэт уонна граждандарга эрийбэт.

Өссө биир сиэртибэнэн ХИФУ 20 саастаах устудьуона буолла, кини «Финконтрольтан» эрийэбит диэбиттэргэ итэҕэйбит. Түөкүттэр эмиэ мессенджеры туһанан, устудьуону 775 тыһыынча солкуобай бэйэтин мунньуммут харчытын банкомат нөҥүө көһөрөргө итэҕэппиттэр. Бу чахчынан эмиэ холуобунай дьыала тэрилиннэ. Полиция гражданнары, счет, харчы туһунан кэпсэтии бардар эрэ, кэпсэтиини тута тохтоторго ыҥырар.

Үһүс сиэртибэнэн хомунаалынай хаһаайыстыба тэрилтэтин 23 саастаах диспетчера буолла. Кыыс Роскомнадзор үлэһитэбин диэн албыннаабыт түөкүҥҥэ итэҕэйэн, 417 000 солкуобайга кирэдьиит оҥотторбут, ол харчытын кэлин уордарбыт. Холуобунай дьыала тэрилиннэ.

Мэҥэ-Хаҥалас улууһугар 22 саастаах урбаанньыт 300 000 солкуобай бэйэтин харчытын сымыйа брокердарга укпут. Бу чахчынан бэрэбиэркэ ыытыллар.

Полиция гражданнары сэрэхтээх буоларга уонна саарбах эрийиилэргэ, этиилэргэ итэҕэйбэккитигэр ыҥырар.