Өрөбүллэргэ түөкүннээһин сытыырхайбыт

Ааспыт өрөбүл күннэргэ Дьокуускай биэс олохтооҕо түөкүттэргэ түбэспиттэрин туһунан полицияҕа сайабылыанньа суруйбуттар. Бу туһунан ИДьМ пресс-сулууспата иһитиннэрэр.

Үрдүк үөрэх кыһатын 2-с кууруһун устудьуон кыыһын түөкүннэр Росфинмониторинг үлэһитэ буолабыт диэн албыннаабыттар. Кинилэр кыыска кирэдьиит оҥотторон, ыйбыт счеттарыгар 400 тыһыынчаттан тахса солкуобайы ыыттарбыттар.

Чэпчэки сыанаҕа дьиэ-уот атыылыыбыт диэн албынныыр түөкүттэр сиэртибэлэринэн 55 саастаах харабыл үлэһитэ, 53 саастаах худуоһунньук-декоратор, 51 саастаах куруһуок салайааччыта уонна 41 саастаах кэрэ салонун маастара буолбуттар. Дьахталлар албыҥҥа киирэн 400, 800, 800 уонна 400 тыһыынча солкуобай харчыларыттан маппыттар.

Холуобунай дьыалалар тэриллибиттэр.

Санатабыт, түөкүттэр сиэртибэлэрин кытта видео сибээһинэн уонна биллэрии сервистэригэр сибээстэһэллэр, чэпчэки билиэти, чэпчэкитик харчы үлүннэрэр инвестициянан угуйаллар, «Госуслуги» аккауҥҥутун алдьаппыттар диэн куттууллар уонна оҥоһуу өйү туһаналлар.