Өрөгөй ыһыаҕа

Улуу Кыайыы 80 сылынан Уус Алдан улууһун Бороҕон нэһилиэгэр тыа хаһаайыстыбатын сылыгар аналлаах Өрөгөй ыһыаҕа ыытылынна.

«Ыһыах алгыһын куппар-сүрбэр иҥэрэн» алгыс сиэрин-туомун СӨ култууратын туйгуна, алгысчыт, ырыаһыт Виталий Очиров түһүлгэҕэ кэлбит ытык ыалдьыттары, нэһилиэк олохтоохторун алҕаата-арчылаата. «Кымыс үрдүн охторуу» сиэрэ-туома ыытылынна. Бу кэнниттэн мустубут дьон-сэргэ кыынньар кымыһынан сүрэхтэрин сөрүүкэттилэр. Салгыы үрүҥ тунах ыһыах бэлиэтин Ытык Дуоҕаны астылар. Ол кэнниттэн, болҕомтону «Айыллан» норуот тыйаатырын артыыстарын «Кыайыы сырдык дьаралыга» театрализованнай дьүһүйүүлэрэ ылла. Бу үөрүүлээх күн үлэлэригэр, үөрэхтэригэр ситиһиилэммиттэри чиэстээтилэр, наҕараадалар туттарылыннылар.

Эҕэрдэ кэнсиэр үҥкүүнэн, ырыанан доҕуһуолланна. Алгысчыт, ырыаһыт Виталий Очиров ыллаан-туойан, күргүөм оһуокайы тэрийдэ, дьону-сэргэни түмтэ.

Ыһыах түһүлгэтигэр биир дойдулаахпыт, бастыҥ меценат, Уус Алдан улууһун уонна Бороҕон нэһилиэгин бочуоттаах олохтооҕо Петр Спиридонович Алексеев ыалдьыттары, биир дойдулаахтарын ыһыах маанылаах аһынан, сибиэһэй этинэн буор босхо күндүлээбитэ бар дьону үөртэ. Онон бары киниэхэ махталлара муҥура суох.

Өрүү да буоларын курдук, күрэхтэһиилэри сэргээтилэр. Түөлбэлэр икки ардыларыгар «Хоһуун үлэһит» эстэпиэтэҕэ 1 м «Эрэл» начаалынньыга Петухова П.М., 2 миэстэни «Дьулуур» начаалынньыга Капитонова Н. П., үсүһү «Үрдэл» түөлбэ начаалынньыга Винокурова М.П. ыллылар. «Саха талба-мааны таҥаһа» күрэскэ Третьякова Туяра бастаата. Иккискэ Иванова Виолетта таҕыста. Поисеев Айдар, Новикова Айыына үһүс буоллулар. «Умнуллубат ол сыллар» хоһоон күрэҕэр Охлопкова Мария Ивановна кыайыылааҕынан таҕыста, 2 миэстэ Халдеева Мария Романовна, 3 миэстэ Егорова Полина Прокопьевна буоллулар. «Кыайыы оһуохайыгар» кылаан чыпчаал үрдүк аатын Протопопова З.И. ылла. 1 миэстэҕэ Бубякина В. С., 2 миэстэҕэ Охлопкова М. И. таҕыстылар. «Олоҥхо дойдутун оҕотобун» күрэскэ 1 миэстэни Мальцева Рема, иккиһи Иванова Виолетта, үсүһү Барашков Даниил, Макаров Арылхан, анал бирииһи Васильев Родион ыллылар. «Көмүлүөк» үһүс саас оскуолатын чилиэннэрин көрдөрүүтүгэр нэһилиэк иистэнньэҥэ, «Якутия мастеровая» өрөспүүбүлүкэтээҕи быыстапкаҕа «Бастыҥ өбүгэ таҥаһа» номинация кыайыылааҕа Габышева А. Г. тикпит таҥастарын, үһүс саас оскуола чилиэннэрэ маастар-кылааска үөрэнэн тиктибит дьэрэкээн суумкаларын, өттүк симэҕин, түүлээхтэн киэргэтэн тикпит саҕаларын дефилета көрөөччүлэри астыннарда.

Маны таһынан, ыһыах спортивнай күрэхтэһиилэригэр улуустартан спортсменнар кэлэннэр, сытыы киирсии буолла. Сүүрдүлэр, хапсаҕайдастылар, мас тардыстылар, массыына состулар, таас көтөхтүлэр. Бары ыытыллыбыт күрэстэргэ үбүлүөйдээх ыһыаҕынан сэрии бэтэрээннэрин, сэрии сылларын оҕолорун, тыыл, үлэ бэтэрээннэрин ааттарын үйэтитэн оҕолоро, сиэннэрэ, хос сиэннэрэ, аймахтар кыттыһан, успуонсардааһыны олохтоон Кыайыы ыһыаҕын таһымын үрдэттилэр.

Байыаннай дьайыыга Ийэ дойдуларын хорсуннук көмүскүү сылдьар патриот уолаттарбыт  Георгий Прокопьев, Иннокентий Васильев, Иннокентий Свешников, Василий Захаров, Пантелеймон Ксенофонтов иккилии улахан бириистэри олохтоон биир дойдулаахтарын үөртүлэр, долгуттулар. Спонсорствоҕа Өлөөнтөн, Орто Халыматтан,Намтан, Дьокуускайтан,Хаҥаластан тиийэ, биир дойдулаахтарбыт, эдэр ыччаттар ытык бэтэрээннэрбит сырдык ааттарын үйэтитэн кыттыбыттара олус махталлаах. «Өйдөбүнньүк» нэһилиэкпит ытык бэтэрээннэрин оҕолорун, сиэннэрин уопсастыбаннай түмсүүтэ Акулина Степановна Сокольникова салалтатынан, дойдуга бэриниилээх буолууга, эдэр ыччаты иитиигэ, уһуйууга үлэлэрэ үтүө тылынан, махталынан ахтылынна. Киэһээ «Түмсүү» СК Виталий Очиров «Айыллан аартыктара» гастрольнай бөлөҕүн кэнсиэрэ олус истиҥник, ытыс тыаһа доҕуһуоллаах ааста. Ыһыах уоттаах-күөстээх «Үрүҥ түүн» дискотекатын салҕаата шоумен Иннокентий Владимиров-Кештиано.

Өрөгөй ыһыаҕын тэрээһинигэр олохтоох дьаһалта, нэһилиэкпит тэрилтэлэрин салайааччылара, “Көмүлүөк” үһүс саас оскуола, “Аал уот” аҕам саастаахтар түмсүүлэрэ, түөлбэ салайааччылара, нэһилиэкпит олохтоохторо күүс-көмө, өйөбүл буоллулар. Өрөгөй ыһыаҕын үрдүк таһымҥа тэрийэн ыыттылар “Түмсүү” сынньалаҥ киинин үлэһиттэрэ. Кинилэргэ дьон-сэргэ олохтоохтор махталлара улахан.

Светлана Прудецкая, бибилэтиэкэр,

Тумул, Уус Алдан.

Виктория Барашкова, Валерий Гоголев хаартыскаларга түһэриилэрэ уонна олохтоох дьаһалта тиксэриилэрэ.