Өрөгөйдөөх күнү бэлиэтээтибит

Кэбээйи улууһун Куокуй нэһилиэгэр Саха Өрөспүүбүлүкэтин Судаарыстыбаннаһын күнэ куруук тэрээһиннээхтик ыытыллар.

Быйыл «Үлэҕэ Албан  аат уонна Ийэҕэ махтал» аллеяҕа саха биллиилээх бэлитиичэскэй диэйэтэлэ Максим Кирович Аммосов олоҕун, үлэтин чинчийбит, үөрэппит, үйэтиппит биһиги биир дойдулаахпыт Гуляев Василий Николаевичка сүгүрүйэн, махтанан туран сибэкки дьөрбөтүн уурдубут. Ону тэҥэ дьоһун олоҕу олорон ааспыт нэһилиэкпит үтүөкэн дьонун ааттарын үйэтитэр эбии саҥа өйдөбүнньүк бэлиэлэри туруорулуннулар. Манна нэһилиэк дьоно-сэргэтэ, оскуола үөрэнээччилэрэ кыттыылаах өрөгөйдөөх миитин буолла.

Куокуй орто оскуолатыгар СӨ Судаарыстыбаннаһын күнүнэн үөрүүлээх тэрээһин оҕолор, учууталлар «Сахам сирэ» ырыаларынан аһылынна. Саха норуотун туһугар үлэлээбит-хамсаабыт киэҥ туттар дьоммут Алексей Кулаковскай, Платон Ойуунускай, Максим Аммосов, Исидор Барахов, Степан Аржаков, Василий Никифоров (Күлүмнүүр) тустарынан литературнай монтаж ааҕылынна.

Олохтоох дьаһалта аатыттан баһылык солбуйааччыта Илья Васильевич Семенов тыл эттэ уонна сылын аайы ыытыллар «Биһиги Арассыыйа гражданнарабыт» аахсыйа чэрчитинэн 14 саастарын туолбут оҕолорго пааспар аныгылыы хаҕын туттартаата.

Оскуолабыт хас биирдии кылааһыттан уолаттар саҥа тиктэриллибит бухатыыр таҥаһын кэтэн, хамсаныылаах хаамыыларын көрдөрдүлэр, көрөөччүлэр дохсуннук ытыстарын таһынан биһирээбиттэрин биллэрдилэр. (Бу иннинээҕи күн  «Сахам сирэ Олоҥхо дойдута» диэн кылааһынан олоҥхоҕо бастакы хардыы, холонуу күрэх ыытыллыбыта).

Күнүс «Угуйаан» култуура киинигэр » Көмүс күһүн, кэрэ күһүн» атыы-эргиэн дьаарбаҥката ыытылынна. Түөлбэлэр олохтоохторо көхтөөх кыттыыны ыллылар.

 

Полина Жергина.