«Мир Арктики» быыстапка ыҥырар

А.Е.Кулаковскай аатынан норуоттар доҕордоһууларын дьиэтигэр  кулун тутар 19-22 күннэригэр «Мир Арктики» эрэгийиэннэр икки ардыларынааҕы быыстапка  сэттис төгүлүн ыытыллар.

Бу быыстапка Арктика күннэринэн тэрилиннэ. Бырааһынньыгы арктическай оройуоннары сайыннарар уонна өйүүр сыаллаах-соруктаах 2014 сыллаахха ахсынньы 11 күнүгэр Ил Дархан олохтообута.

Быыстапка сүрүн тэрийээччилэринэн СӨ тас сибээскэ уонна норуоттар дьыалаларыгар министиэристибэ, СӨ Арктиканы сайыннарыы уонна хоту дойду норуоттарын дьыалаларын министиэристибэтэ, СӨ хотугу аҕыйах ахсааннаах төрүт олохтоох норуоттар Ассоциациялара, А.Е.Кулаковскай аатынан норуоттар доҕордоһууларын дьиэтэ, «Симэх уус-уран оҥоһуктар уонна норуот ускуустубатын национальнай киинэ буолаллар.

Быйылгы тэрээһиҥҥэ 18 хотугу улуустан (Абый, Алдан, Аллайыаха, Анаабыр, Булуҥ, Үөһээ Халыма, Дьааҥы, Эдьигээн, Кэбээйи, Муома, Аллараа Халыма, Өймөкөөн, Өлүөхүмэ, Өлөөн, Орто Халыма, Уус Маайа, Усуйаана, Эбээн Бытантай), Дьокуускайтан, Жатайтан, Дьокуускайдааҕы художественнай училищеттан, «Сирэктэ» эрэгийиэннээҕи уопсастыбаннай организацияттан, Хабаровскай кыраайтан, Сахалин уобалаһыттан, барыта 99 киһи кыттар. Маны сэргэ, Орто Халыма оройуонуттан С.Н.Бандеров аатынан Орто Халыматааҕы кыраайы үөрэтэр түмэл филиала — Березовскайдааҕы нэһилиэк түмэлэ, «Тымныы полюһа» кыраайы үөрэтэр түмэл Дьааҥыттан аан бастан кытталлар. Күөн күрэскэ киирбит үлэлэри дьүүллүүр сүбэ сыаналыыр.

Тэрээһини «Ниргин» ансаамбыл (сал.СӨ култууратын туйгуна Екатерина Кривошапкина, Кэбээйи) уонна «Индигир» үҥкүү кэлэктиибэ (сал.Лариса Рожина, Аллайыаха) киэргэттилэр.

Маны сэргэ, А.Е.Кулаковскай аатынан норуоттар доҕордоһууларын дьиэтигэр табаһыттар сийиэстэрин иитинэн «Мир кочевья» өрөспүүбүлүкэтээҕи быыстапка-куонкурус ыытыллар. Күрэскэ киирбит үлэлэри бастакы этээскэ көрүөххэ сөп. Күөн күрэһи тэрийээччилэринэн норуот айымньытын дьиэтэ уонна СӨ тыатын хаһаайыстыбатын министиэристибэтэ буолаллар.

А.Е.Кулаковскай аатынан норуоттар доҕордоһууларын дьиэтин пресс-сулууспата

Хаартыскаларга Айталина Аргунова түһэриилэрэ