Эрэйдээх каарта буолла

Тус көлөтө суох дьон, биэнсийэлээхтэр, үксүн оптуобуһунан  айанныыбыт. Урукку өттүгэр “Алмаасэргиэнбаан» нөҥүө ылбыт социальнай каартаны туһанарбыт.

Онтукайбыт сороҕор киһини бөрүкүтэ суох балаһыанньаҕа киллэрэр түгэннэрдээҕэ. Оптуобус  терминала төлөбүрү ылыммат түбэлтэтигэр хаста да түбэһэн турардаахпын. Бырайыаспын туһанарга төлөөбүт чиэкпин тутан туран оннооҕор дакаастаабатаҕым.  Бэл диэтэр, кондуктор дьахтар “В таком возрасте мошенница.  Наловчились обманывать государство! «, — диэн дьон-сэргэ ортотугар саҥаран, кыһытан бардан, хомотон таһаарбыта.

Бу быйыл “Саха сирин олохтооҕун каартата” диэни кытаанах хайҕааһын буолбута.  Атыыластаххына харчыҥ сороҕо бэйэҕэр төннөр  (кэшбек диэн муодунай тылы сыһыарбыттар) диэн реклама бөҕөтө.  Төһө кырдьыгын билбит суох.  Аны туран оптуобуска  чэпчэтиилээх диэн буолбута.

Балаҕан ыйын 20 күнүгэр АЭБ- ка бырайыаспын туттарбар сүбэлэтэ тиийбитим.  Биир үлэһит кыыс: «Каарта активацияланна, алтынньы 1 күнүттэн оптуобуска туһанар кыахтанныҥ», — диэн үөрдүбүтэ. Бэҕэһээ оптуобуска каартам үлэлээбэтэ. Терминал “Ваша карта в стоп-листе” диэн саҥарар.  Бүгүн эмиэ бааҥҥа тиийэн быһаарсан, сөрү диэн сөхтүм, соһуйдум.  Активация диэни оҥотторорбор сайабылыанньа суруйан, илии баттаан туттарыахтаах эбиппин.  Ону 20 чыыһылаҕа ким да оннук оҥотторботоҕо. Тылларынан мээнэ эппиттэрэ. Ол аата тугуй, киһини күлүү оҥостуу дуу, тугуй? Ол үлэһит хамнас ылар үлэтин, эбээһинэһин ситэ билбэт эбэтэр итинник дьалаҕайдык сыһыаннаһар дуу?

Саатар, аатын-суолун билбэт буолан, таах хаалыаҕынааҕар сурукка тистим. Тэрилтэҕэ наадаҕа сырыттахха, докумуону ылар, толорор үлэһит аатын-суолун ирдиир наада эбит. Этэргэ дылы, “ Таҥара сэрэҕи таптыыр”.

Каартам моһуоктаабытын туһунан үҥсүү сурукпар баан дьаһалтатыттан хоруй күүтэбин.

Сааһыран эрэр дьон буруйа суохпутугар сирэй-харах анньылла сылдьарбыт бэрдэ суох.

Тамара Винокурова, үлэ бэтэрээнэ

Хаартыска: СИА архыыбыттан