“Эрэл” дьаарбаҥкаттан киирбит харчыны – Кыайыы туһугар

Аллайыаха улууһун Бөрөлөөх олохтоохторо бэс ыйын 12 күнүгэр Арассыыйа күнүн түмсүүлээхтик бэлиэтээтибит.

Ол курдук, “Алмазная мозаика” Зоя Слепцова кыра эрдэҕиттэн сөбүлүүр дьарыгын быыстапкатын туруоран, көрбүт дьон олус биһирээтилэр. Ону тэҥэ “Горжусь Россией” диэн ааттаах хорсун санаа-быһыы аахсыйата тэрилиннэ. “Россия — великая держава” кинигэ быыстапкатын сэргэ ыйытык — хоруй ыытыллан, эдэр ыччат Михаил Рожин кыайыылаах буолла.

Аны анал байыаннай дьайыыга сылдьар дьоммутугар аналлаах атыы-дьаарбаҥкатын үлэ бэтэрээнэ Полина Спиридоновна тэрийдэ. Кини бу күн 78 сааһын туолбутунан эҕэрдэлэри тутта.  Полина Спиридоновна бу үһүс дьаарбаҥкатын тэрийэн, уопсайа 41 тыһ. киллэрэн, Дьокуускай куоракка улэлиир “Вместе мы – сила” волонтердар штабтарыгар көмө оҥордо. Кини “Эрэл” диэн ааттаан астаан атыылыыр дьаарбаҥкаларын өссө да тэрийиэ. Сахабыт сириттэн сылдьар дьоммут кыайыылаах дьиэлэригэр төннүөхтэрэ диэн эрэлин биллэрэр, бу барыбытыгар холобур эрэ буолар.

Бу күн Егор Николаевич уонна Федосия Васильевна ааттарын үйэтитэн, олорбут диэлэригэр өйдөбүнньүк бэлиэ ыйаатыбыт. Кинилэр холкуос, сопхуос бэтэрээннэрэ, сэрии кэмин оҕолоро. Кыайыы туһугар кыра саастарыттан ыла үлэ үөһүгэр сылдьыбыт дьонунан биллэллэр.

Людмила Колесова, Бөрөлөөх