«Эрэл» ТХПК аһын-үөлүн дэлэтэр

Нюргун Гуляев толорооччу дириэктэрдээх «Эрэл» ТХПК аһын-үөлүн Нам улууһун дьоно-сэргэтэ эрэ буолбакка, улуус ыалдьыттара, Дьокуускай куорат олохтоохторо олус сөбүлээн атыылаһаллар. 

Билигин кэпэрэтиип  кыһыннары-сайыннары 84 киһини, ону таһынан 15 үлэһити эбии сөбүлэҥ быһыытынан үлэнэн хааччыйар диэн Нам улууһун дьаһалтата иһитиннэрэр.

Тэрилтэ саха маанылаах сандалытын төрүт аһын-үөлүн тарҕатыыга, өбүгэлэрбит урут-уруккуттан харыстаан илдьэ кэлбит астарын ырысыаптарын бу күҥҥэ диэри тиэрдиигэ, өссө тупсарыыга, аныгылыы тыынныырга дьулуһар. Саха төрүт куукунатын (аһылыгын, утаҕын) байытан уонна эбэн үлэтин хайысхатын сыллата кэҥэтэр. Ол курдук, үүт, эт, оҕуруот аһын  тутуутунан, полуфабрикат астары оҥоруунан дьарыктанар, күһүнүн нэһилиэнньэттэн отону тутан кыһыннары астыыр.

Үөдэйгэ, Бастакы Хомустаахха, Никольскайга, Аппааныга, Кыһыл Дэриэбинэҕэ, Бөтүҥҥэ, Хатырыкка үүт тутар пууннары, ону сэргэ 3 үүтү кииннээн тутар собуоттары  Партизаҥҥа, Модукка, Намҥа,  Арбыҥҥа, маны сэргэ Түбэҕэ, Салбаҥҥа, Искраҕа арыы сыахтарын үлэлэтэр.

Намнааҕы кииннэммит сыахха 6 көрүҥ үүт ас – холбуйуу сүөгэй, сүөгэй, суорат, кефир, үүт, мороженай оҥоһуллар. Сотору кэминэн йогурт оҥорон нэһилиэнньэҕэ тиэрдиэхтэрэ. Оттон Партизаҥҥа – арыы, холбуйуу сүөгэй,  иэдьэгэй, Модукка – арыы, быырпах уонна чохоон оҥорон таһаараллар.

Сыл аайы тэрилтэ сонунтан сонун үүт бородууксуйатын маҕаһыыннарыгар  таһааран нэһилиэнньэ биһирэбилин ылар. Маны таһынан аныгы үйэ хаамыытынан ас хаатын көстүүтүгэр кытта хатыламматы,  саҥаны киллэрэр. Ол курдук, соторутааҕыта Сахабыт сирин биллиилээх айар хампаанньата  “Suorat” («Суорат” ) айар хамаанда салайааччыта Альберт Ноговицыны  кытта бииргэ үлэлэһэн суорат саҥа упаковкатын оҥорон атыыга таһаардылар. Онуоха сонун, дьиҥ сахалыы көстүүлээх хаалаах суораты нэһилиэнньэҕэ тиэрдиигэ «Эрэл» уонна  “Suorat” ылсыбыт дьыалалара дьону сэҥээртэ. Билигин маннык саҥа хаалаах өбүгэбит төрүт аһа, суорат,   “Эрэл” ТХПК бары маҕаһыыннарыгар атыыга хамаҕатык бара турар.

Бу курдук тэрилтэ үгүс үйэлэр усталарыгар өбүгэлэрбит аһаан кэлбит төрүт астарынан хааччыйан дьон-сэргэ чэгиэн-чиргэл доруобуйалаах буоларыгар кылаата улахан.