Эрэллээх Доҕор өлбүт хаһаайынын кэтэһэр

Хаһаайыныгар бэриниилээҕин иһин саха Хатикота диэн ааттаммыт ыт Өлөөҥҥө баар. Доҕор диэн ыт бэһис сылын хаһаайынын Өлөөн улууһун дьаһалтатыгар киирэн, кэтэһэр, көрдүүр.

Доҕор хаһаайына — Өлөөн улууһун баһылыга Александр Иванов 2020 сыллаахха сүрэҕэ тохтоон, соһумардык күн сириттэн күрэммитэ. Ол кэмтэн ыла кини эрэллээх Доҕоро күн аайы тапталлаах хаһаайына үлэлээбит сиригэр — улуус дьаһалтатын дьиэтигэр кэлэр. Ааҥҥа кэлэн үрдэҕинэ, иһирдьэ киллэрэллэр. Доҕор көрүдүөрүнэн аа-дьуо хаамыталыы сылдьан, кэбиниэттэри кэрийэн көрөр, көрдүүр. Онтон хаһаайынын урукку кэбиниэтин аттыгар курустук сытынан кэбиһэр. Бу сытан, тугу саныыра буолла?

Кини дьиэтэ суох ыт буолбатах, көрөллөр-истэллэр. Ол да буоллар, хаһаайынын сүтэрбитин билиммэт, биир үтүө күн үлэтигэр тиийэн кэлиэ дии саныыр. Ордук дьаһалтаҕа дэлэгээссийэлэр, массыыналар кэллэхтэринэ, сэргэхсийэр, хайаан да баар буолар.

Билигин Өлөөн, Анаабыр улуустарыгар айтишниктар бөлөхтөрө тиийэн, үлэлии сылдьаллар. Кинилэри кытта үөрэх управлениетын үлэһитэ, блогер Спиридон Борбуев баран, Доҕору булан, хаартыскаҕа түһэрдэ уонна телеграм-ханаалыгар таһаарда.

Александр Иванов Өлөөн улууһун баһылыгынан 2013 сыллаахха талыллыбыта. 2018 сыллаахха хос талыллыбыта. Ол быыбарга улуус олохтоохторун 94,76%-ра киниэхэ куоластарын биэрбиттэрэ. Өлөөн сэлиэнньэтигэр Александр Иванов аатынан искибиэр, пааматынньык баар.

Кыыллар да өйдүүр өйдөөхтөр, саныыр санаалаахтар, таптыыр сүрэхтээхтэр. Ол туоһутунан бу Доҕор буолар.