Болуоссакка аһаҕас халлаан анныгар дуобаттаатылар

Бүгүн, бэс ыйын 1  күнүгэр, Дьокуускайга Өрөспүүбүлүкэ болуоссатыгар Улуу Кыайыы 80 сылынан дуобаттаатылар.

Дуобатчыттарга ураты дьоллоох күн тосхойдо. Ол курдук, араас көлүөнэ дуобатчыттара өрөспүүбүлүкэ бастакы гроссмейстерын Александр Азаровы, норуоттар икки ардыларынааҕы гроссмейстердары, Арассыыйа уонна Европа чөмпүйүөннэрин Иван Токусаровы, Николай Гуляевы кытта күрэстэстилэр. 80 дуоскаҕа 107 киһи оонньоото. Сеанс түмүгүнэн 13 тэҥ-тэҥигэр уонна 1 кыайтарыы баар буолла. Көрдөрүүлэрэ 99,5:7,5 гроссмейстердар туһаларыгар. Кыайыылаах — успуорт маастарыгар кандидат, ДЮСШ-5 иитиллээччитэ, 12 саастаах Тимур Бурнашев. Тириэньэрэ — Иван Павлов.

Тэрээһин бочуоттаах ыалдьытынан Аҕа дойду сэриитин бэтэрээнэ, РСФСР успуордун бэтэрээнэ Наум Трифонович Слепцов буолла. Кини дуобакка уонна шахмакка бастакы разрядтаах. Манна даҕатан эттэххэ, Наум Трифонович кулун тутарга 101 сааһын туолбута. Кини Аҕа дойду сэриитин кэнниттэн, дойдутугар эргиллэн кэлэн баран оскуола үөрэнээччилэригэр бу оонньууну киэҥник тарҕатарга улахан үлэни ыыппыта. Наум Трифонович үөрэппит, дьарыктаабыт оҕолоро оройуон, өрөспүүбүлүкэ таһымнаах күрэхтэһиилэргэ кыайыылааҕынан буолаллара. Ытык кырдьаҕас бэтэрээннэр уонна ыччаттар сүүмэрдэммит хамаандаларын икки ардыларыгар күрэхтэһиини тэрийэри көҕүлээбит киһинэн буолар.

Тэрээһин үөрүүлээх арыллыытыгар күрэхтэһии кыттыылаахтарын уонна тэрийээччилэри СӨ Бырабыыталыстыбатын Бэрэссэдээтэлин солбуйааччы  Сергей Местников эҕэрдэлээтэ. Күрэхтэһиигэ эмиэ кытынна. Кини успуорт бу көрүҥэ сайдан иһэрин, сэргиир, сэҥээрэр дьон элбээбитин бэлиэтээтэ. Бүтүн Арассыыйатааҕы уонна норуоттар икки ардыларынааҕы күрэстэргэ эдэр дуобатчыттар үрдүк көрдөрүүлэри ситиһэллэриттэн үөрэрин, киэн туттарын эттэ. Успуорт бу көрүҥүн өрөспүүбүлүкэҕэ элбэх киһи сыаналыырын, сөбүлээн оонньуурун бэлиэтээн туран, кинилэргэ анаан бэс ыйын 2  күнүгэр 19.30  ч. «Саха» НКИХ эпииригэр «Битва гигантов» дуобакка матч саҕаланарын иһитиннэрдэ.

Дуобакка Саха сирин оскуолата 20-чэ гроссмейстеры уонна 96-тан тахса маастары иитэн-үөрэтэн таһаарбыт. Арассыыйаҕа, Европаҕа уонна аан дойдуга бастыыр иһин күрэхтэһиигэ ыччат сүүмэрдэммит хамаандата сыл ахсын 100-тэн тахсалыы мэтээли ылар. Өрөспүүбүлүкэтээҕи икки спортивнай оскуолаҕа уонна 17 оҕо-спортивнай оскуолатыгар дуобакка отделениелар бааллар, онно 42 тириэньэр үлэлиир.

Сиһилии: https://www.sakha.gov.ru/news/5710 манна көрүөххэ сөп.

СӨ Ил Дарханын уонна Бырабыыталыстыбатын пресс-сулууспата

Хаартыскалар: sakha.gov.ru ылылыннылар