Өрөспүүбүлүкэ араас улууһуттан 100 оҕо “күөх пионердар” кэккэлэрин кэҥэттэ

 Чэппиэргэ, бэс ыйын 20 күнүгэр, “Кэскил” оҕо лааҕырын базатыгар “Планетаны харыстаа!” симиэнэни үөрүүлээхтик аһыы кэмигэр  “Саха сирин от күөх пионердара” VIII сүлүөт саҕаланна. Өрөспүүбүлүкэ араас улууһуттан 100 оҕо “от күөх пионердар” кэккэлэрин кэҥэттэ. Эдэр экологтар хамсааһыннарын, үгэс курдук, АЛРОСА хампаанньа өйүүр уонна үбүлүүр. Тэрээһин экологияҕа билиини элбэтиигэ, экология култууратын таһымын үрдэтиигэ уонна тулалыыр эйгэҕэ харыстабыллаах сыһыаҥҥа туһуланар.

Сүлүөтү СӨ  Экологияҕа, айылҕаны туһаныыга уонна ойуур хаһаайыстыбатыгар министиэристибэтэ тэрийэр. Онтон оператор “Бэс чагда” оҕо сынньалаҥын уонна чэбдигирдии киинэ  “Бастакылар хамсааһыннара” оҕолор уонна ыччаттар Бүтүн Арассыыйатааҕы хамсааһыннарын тирэх былаһааккатынан буолар.

-“Саха сирин от күөх пионердара” хамсааһын 2017 сыллаахха “От күөх пионердар” Бүтүн Арассыыйатааҕы хамсааһын  чэрчитинэн Экология сылыгар тэриллибитэ. Биһиги экологияны кэтээн көрөр иниспиэксийэ нөҥүө Саха сирин улуустарыттан  кыттааччылары миэстэтигэр талабыт. Кыттааччылар —  естественнэй науканан дьарыктанар оҕолор, экология тэрээһиннэрин актыбыыстара уонна көҕүлээччилэрэ, экологияҕа аналлаах куонкурустар кыайыылаахтара.

Быйыл кэлбит 100 оҕону саастарынан көрөн,  түөрт этэрээккэ араардыбыт. Симиэнэ кэмигэр учуонайдар уонна экология исписэлиистэрэ  лиэксийэлэри ааҕыахтара, экология тиэмэтин блогердарын кытары көрсүһүүлэр, араас биктэриинэлэр, култуура уонна успуорт тэрээһиннэрэ ыытыллыахтара, — диэн  экологияны сырдатыы уонна айылҕа ураты харыстанар сирдэрин департаменын сүрүн исписэлииһэ Ньургуйаана Гуринова кэпсээтэ.

Оҕолору симиэнэ аһыллыбытынан СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Евгений Перфильев эҕэрдэлээтэ. Кини оҕолор бу хамсааһыннара сылтан сыл аайы улаатан иһэрин, уопсайынан өрөспүүбүлүкэҕэ хайыы үйэ 8 тыһыынчаттан тахса “от күөх пионер” баарын бэлиэтээтэ.

«Экология министиэристибэтин аатыттан барыгытын “Саха сирин от күөх пионердара” өрөспүүбүлүкэтээҕи VIII сүлүөт уонна “Планетаны харыстаа!” симиэнэ аһыллыытынан эҕэрдэлиибин. Эһиги 21 хонук устата төрөөбүт Сахаҕыт сирин, Кыһыл кинигэҕэ киллэриллибит үүнээйилэр уонна кыыллар көрүҥнэрин, ураты харыстанар сир-уот тустарынан олус элбэҕи билиэххит. Эһиги экологияҕа аналлаах бырайыактары оҥоруоххут уонна көмүскүөххүт. Мин бэйэм кэммэр “Бастакылар хамсааһыннарын” (урут “Туймаада” лааҕыр диэн ааттааҕа) салайар Анна Сергеевналыын манна экология симиэнэтин кыттыылааҕын быһыытынан    турбутум соторутааҕыта аҕай курдук. Бары бэйэ-бэйэҕитин кытары доҕордоһоргутугар баҕарабын, эһиги  кэлэр кэм   экологтарынан  буолаҕыт”, — диэтэ Евгений Перфильев.

Сүлүөт – “От күөх Арассыыйа” Бүтүн Арассыыйатааҕы экология хамсааһынын чэрчитинэн үлэлиир эдэр экологтарга маҥнайгы былаһаакка. Саха сиригэр эдэр экологтары хаһыс да сылын АЛРОСА көхтөөхтүк өйүүр.

Экологияны сырдатыы боппуруостара алмаастаах хампаанньа социальнай бэлиитикэтигэр ураты миэстэни ылаллар. АЛРОСА өрөспүүбүлүкэни кытары бииргэ Саха сирин уйан айылҕатын харыстыыр сүрүн  соруктаах экология бырайыактарын олоххо киллэрэр.

Этэрээттэр бары эҕэрдэ тыллар уонна Арассыыйа, Саха сирин уонна “Планетаны харыстаа!” симиэнэ  былаахтарын  өрө таһаарыы кэнниттэн  эдэр экологтар андаҕардарын эттилэр, тулалыыр эйгэни харыстыырга уонна ыраастык тутарга,  кырачаан доҕотторго үтүө холобур буоларга, кинилэри айылҕаҕа харыстабыллаахтык сыһыаннаһарга үөрэтэргэ эрэннэрдилэр. Ол кэнниттэн кинилэргэ “От күөх пионердар” бэлиэлэрин – от күөх хаалтыстары баайдылар.

Санатан эттэххэ, “Саха сирин от күөх пионердара” – “От күөх Арассыыйа” Бүтүн Арассыыйатааҕы экология хамсааһынын састаабыгар баҕа өттүнэн киирэр оҕо экология-патриотическай хамсааһына.

АЛРОСА айылҕа харыстабылын уонна экологияҕа куттал суох буолуутун боппуруостарыгар улахан болҕомтотун уурар. Хампаанньа сыл аайы бу сыалга-сорукка 6 миллиартан тахса солкуобайы биэрэр. Хампаанна өйүүр бырайыактарыттан биирдэстэригэр – “Саха сирин от күөх пионердара” сүлүөккэ оҕолор тулалыыр эйгэни таптыырга уонна эппиэтинэстээхтик сыһыаннаһарга үөрэнэллэр. Бырайыак үүнэр көлүөнэни төрөөбүт кыраайдарын айылҕатыгар сыһыарарга, дьоҕурдаах үөрэнээччилэри өйүүргэ туһуланар. Хампаанньаҕа тоһоҕолоон бэлиэтииллэринэн, экология хамсааһына оҕолор тулалыыр эйгэҕэ харыстабыллаахтык сыһыаннаһалларыгар эрэ ииппэт, ону таһынан  төрөөбүт дойдуга таптал, бэриниилээх буолуу иэйиитин уһугуннарар.