Андрей Сорокин хаартыскаҕа түһэриитэ, СИА
Бүгүн, олунньу 18 күнүгэр, Ил Дархан Айсен Николаев мэдиссиинэ тэрилтэлэригэр 28 УАЗ күлүүһүн туттарда. Бу анал көлөлөрү доруобуйа харыстабылын бастакы сүһүөх звенолара туһаныахтара. Көлөлөр 21 улууска ыытыллаллар.
Ил Дархан улуустар, куораттар балыыһаларыгар көлөлөр күлүүстэрин туттарыы үтүө үгэс буолбутун бэлиэтээтэ.
«Кэнники сылларга национальнай бырайыагынан сүүһүнэн массыына биһиги өрөспүүбүлүкэбитигэр кэлбититтэн олус үөрэбин. Олор бары улуустарга сүүрэ сылдьаллар, дьону эмтииргэ, дьоҥҥо көмөлөһөргө, быыһыырга, эми-тому тиэрдэргэ улахан көмөлөөхтөр. РФ Бэрэсидьиэнигэр В.Путиҥҥа бу бырайыак салҕанарын иһин махтанабын. 2021 сылтан доруобуйа харыстабылын бастакы сүһүөх звенотун саҥатытан оҥоруунан биһиэхэ олус элбэх ахсааннаах эбийиэк тутулунна. Бүгүҥҥү күнү ылан көрдөххө, өрөспүүбүлүкэҕэ балыыһа улахан комплекстарын таһынан, биэлсэр-акушер пууннара, амбулаториялар тутуллаллар, мэдиссиинэ тиэхиньикэтинэн, анал тырааныспарынан хааччыллыы салҕанар«, — диэн эттэ Ил Дархан Айсен Николаев чахчы да үөрэн-көтөн туран.
Бу анал тиэхиньикэлэр пациеннары таһарга, быраастар ыарыһахтары көрө баралларыгар, ыраах олорор сэлиэнньэлэри эминэн-томунан хааччыйарга, о.д.а. туһалыахтара, көмөлөөх буолуохтара.
«Биһиги киэҥ, ырааҕынан тайаан сытар нэһилиэктэрдээх сирбитигэр-уоппутугар маннык тырааныспардар олус наадалаахтар. Нам улуустааҕы киин балыыһатыгар национальнай бырайыагынан бу онус көлөбүт буолар. Бу тырааныспар 1 Хомустаах амбулаториятыгар бэриллиэ«, — диэн Нам оройуоннааҕы киин балыыһатын салайар Ариан Сергеев эттэ.
Саҥа көлөлөр Амма улууһугар Амма-Наахара амбулаториятыгар, Алдаҥҥа Ленинскэйгэ амбулаторияҕа, Үөһээ Бүлүүгэ Хомустаах амубалториятыгар, Дьааҥыга Адыаччыга, Боруулаахха уонна Табалаахха, Бүлүүгэ Баппаҕаайыга, Тылгыныга уонна Үгүлээккэ, Нам улууһугар 1 Хомустаахха, Мэҥэ Хаҥаласка Табаҕа уонна Наахара амбулаторияларыгар, Таатта улууһугар Игидэйгэ, Сунтаар улууһугар Бүлүүчээн амбулаториятыгар, Хаҥаласка Улахан Ааҥҥа уонна Нөмүгүгэ, Чурапчы улууһугар Сылаҥ уонна Дириҥ амбулаторияларыгар, Горнай оройуоннааҕы киин балыыһатын поликлиникатыгар, Кэбээйи, Аллайыаха, Өлүөхүмэ, Томпо улуустарын поликлиникаларыгар, Мииринэйгэ, Ньурбаҕа, Ленскэйгэ оройуоннааҕы киин балыыһаларга, Уус Алдан улууһугар Баатаҕайга биэлсэр-акушер пуунугар, Уус Маайаҕа Солнечнайга амбулаторияҕа бэриллэллэр.
Кэнники сылларга Саха сирин балыыһалара 331 саҥа тырааныспарынан хааччыллыбыттар. Ол иһигэр, 92 суһал көмө массыыната уонна 19 мобильнай комплекс. Доруобуйа харыстабылын министиэристибэтигэр маннык хааччыллыы ордук ыраах баар нэһилиэнньэлээх пууннарга дьон-сэргэ доруобуйатын көрөргө, быһыыны туруорарга көмөлөөх буолбутун бэлиэтииллэр.
Бу сылга өрөспүүбүлүкэ өссө 17 тиэхиньикэни ылар былааннаах.
Санатан эттэххэ, өрөспүүбүлүкэҕэ мэдиссиинэ тырааныспарын саҥардыы «Продолжительная и активная жизнь» национальнай бырайыак иитинэн, «СӨ доруобуйа харыстабылын бастакы сүһүөх звенотун саҥатытыы» бырагырааманан ыытыллар.
СӨ Ил Дарханын уонна Бырабыыталыстыбатын пресс-сулууспата
Андрей Сорокин хаартыскаларга түһэриитэ, СИА
Битэмииннэр тустарынан билэҕит дуо? Үксүбүт күүһү-уоҕу биэрэллэр, иммунитеты үрдэтэллэр, баттах түһэрин тохтотоллор диэн билэбит. Манна…
Күөл мэндээркэй ньуурун одуулуу биир аҕам саастаах киһи уһуннук олорбута. Сүрэҕин сүүдүтэр ыар санаа баттыга…
Олох хаамыытын батыһан, билигин дьиэни-уоту бэрт тупсаҕайдык уонна толору хааччыллыылаах оҥостор буоллулар. Дьэ маннык дьиэлэри…
СӨ ОДьКХ уонна энергетикатын миниистирэ Вячеслав Емельянов Аҕа дойду уоттаах сэриитигэр Улуу Кыайыы 80 сылынан…
Маны билэҕит дуо? Куоска минньигэс амтаны билэр дуо? Оттон саамай улахан кинигэ төһө ыйааһыннаах буолуо…
Бүтүн Арассыыйатааҕы олимпиада түмүктүүр түһүмэҕэр (ВсОШ) Дьокуускайга дойду 80 эрэгийиэниттэн 300 кэриҥэ үөрэнээччи кыттыаҕа. Муус…