Өрөспүүбүлүкэ болуоссата «ДВ Зодчество-2025» архитектура бэстибээлигэр Гран-при буолла

Хабаровскайга Арассыыйа үтүөлээх архитектора Александр Ческидов аатынан «ДВ Зодчество-2025» диэн 18-с төгүлүн ыытыллар бэстибээл түмүктэрин таһаардылар. «Мастер» бэстибээлгэ Гран-при аатын «Якутпроект» институт оҥорон таһаарбыт эбийиэгэ — Дьокуускайга баар Өрөспүүбүлүкэ болуоссата ылла. Бу туһунан СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.

Бырайыак ааптардара: Иннокентий Николаев, Иван Шишигин, Михаил Алексеев, Валерий Олесов, Туйаара Шапошникова. Эбийиэк маны таһынан  «Ландшафтная архитектура и дизайн городской среды» категорияҕа кыһыл көмүс дьупулуомунан наҕараадаланна.

2024 сыллаахха уопсастыбаннай сир Дьокуускай сайдыытын маастар-былаанын иитинэн реконструкцияланан, национальнай истииллээх аныгылыы архитектураламмыта.