Өрөспүүбүлүкэ болуоссатыгар Саҥа дьыллааҕы харыйаны туруоруохтара

Дьокуускай куоракка аныгыскы нэдиэлэттэн Өрөспүүбүлүкэ болуоссатыгар Саҥа дьыллааҕы сүрүн харыйаны туруоруу үлэтэ саҕаланыаҕа.

Ол туһунан “Эксплуатационнай-тиэхиньиичэскэй хааччыйыы сулууспатын” салайааччыта Александр Трофимов иһитиннэрдэ.

“Саҥа дьыллааҕы харыйаны олордуу үлэтин  сэтинньи 5 күнүгэр саҕалыахтара уонна ахсынньы 1 күнүгэр диэри бүтэриэхтээхтэр. Ону таһынан Ленин пааматынньыгын өттүгэр оҕолорго аналлаах сыыр уонна уоттаах-күөстээх инсталляция баар буолуохтара”, — диэтэ кини.

Өрөспүүбүлүкэ сүрүн болуоссатыгар харыйа уотун сандаардыы сыл аайы дойдуга бастакынан, ахсынньы 1 күнүгэр буолар. Үгэс курдук, бу кэмҥэ  “Кыһын Саха сириттэн саҕаланар” бэстибээл ыытыллар.

Санатан эттэххэ, билиҥҥи балаһыанньаны учуоттаан,  быйыл Саха сирин судаарыстыбаннай былааһын уорганнарыгар Саҥа дьылынан корпоративнай тэрээһиннэри ыыппаттарыгар этиллибитэ. Оттон уһуйааннарга уонна оскуолаларга  оҕолорго аналлаах тэрээһиннэр тохтотуллубаттар.

СӨ Ил Дарханын уонна бырабыыталыстыбатын пресс-сулууспата