Өрөспүүбүлүкэ болуоссатын фонтанын Оҕо көмүскэлин күнүгэр холбуур былааннаахтар

Өрөспүүбүлүкэ сүрүн болуоссатыгар фонтаны бэс ыйын 1 күнүгэр холбуур былааннаахтар. Ити туһунан Айсен Николаев “Саха” СТРХ “Прямой разговор” бырагырааматыгар Дьокуускай куорат олохтооҕун ыйытыытыгар хоруйдууругар иһитиннэрдэ.

“Өрөспүүбүлүкэ болуоссатын фонтанын бэс ыйын 1 күнүгэр холбуохтаахпыт. Ол эрээри, күн-дьыл туран биэрдэҕинэ эрдэлиэн сөп. Өрөспүүбүлүкэ болуоссата тупсубутун көрөбүт, дьон мустар сиринэн буолла. Хойукка диэри үлэлиибин, киэһэ түннүгүнэн көрөр өрүү үчүгэй: олус элбэх киһи, кинилэр кэккэлэригэр оҕолоох ыал эмиэ күүлэйдииллэр, сынньаналлар. Араас көлүөнэ дьон көрсөр, сынньанар уопсастыбаннай эйгэтинэн буоларын туһугар болуоссат оҥоһуллар” – диэн Ил Дархан этэр.

Санатан эттэххэ, Өрөспүүбүлүкэ болуоссакка Дьокуускай куорат маастар-былаанын олоххо киллэрии иитинэн киэҥ далааһыннаах туспарыы үлэтэ барбыта. Болуоссат өрөспүүбүлүкэ таһымнаах араас тэрээһиннэр ыытыллар киин куорат олоҕун уопсастыбаннай киининэн буолла.

Бу туһунан Ил Дархан уонна Бырабыыталыстыба пресс-сулууспата суруйар.