Өрөспүүбүлүкэ Филармониятын симфоническай хора Шанхайга үрдүкү наҕараадаҕа тигистэ

Кытайга V Шанхайдааҕы норуоттар икки ардыларынааҕы хордар бэстибээлин «Хор сүрэҕэ» куонкурус түмүктэннэ.

Арассыыйа чиэһин көмүскээбит Саха сирин симфоническай хора «Светская музыка» номинацияҕа үрдүк наҕарааданан — Кыһыл көмүс дипломунан наҕараадаланна.

«Духуобунас музыка» диэн уустук категорияҕа кэлэктиип бочуоттаах Үрүҥ көмүс диплому ылла. Ону сэргэ хор омук кэлэктииптэрин ортолоргура «Лучшее исполнение песни на китайском языке» диэн анал номинацияҕа дипломант буолла.

«Саамай үрдүк конкуренция таһымыгар Саха сирин хора бэйэтин дьоһуннаахтык билиһиннэрдэ. Саха сирин толорооччулара аан дойду таһымыгар уопуттаах истээччилэр сүрэхтэрин баһылыыр кыахтаахтарын дакаастаатылар. Симфоническай хорун кыайыыта бу көннөрү ситиһии буолбатах, Саха сирин күүһүн, кэрэ култууратын киэҥ эйгэҕэ таһаарар кыаҕын көрдөрөр», – диэн Филармония үлэһиттэрэ бэлиэтииллэр.

Бэстибээлгэ Кытайтан, Швецияттан, Румынияттан, Израильтан, Сербиятан, Болгарияттан, Соҕуруу Африкаттан, Венгрияттан уонна да атын дойдулар хоровой кэлэктииптэрэ кыттыыны ыллылар. Саха сирин артыыстара «Подмосковные вечера» уонна Кытай норуодунай ырыаларын толордулар.

«Хор сүрэҕэ» бэстибээл 2013 сылтан үгэскэ кубулуйан, аан дойду профессиональнай былаһааккатын быһыытынан буолар. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.