Женни Стрюкова хаартыскаҕа түһэриитэ.
Бүгүн Дьокуускай куоракка Комсомольскай болуоссакка үөрүүлээх түгэн буолла. Ол курдук, манна хара сарсыардаттан сабыс саҥа «суһал көмө» массыыналара (“Соболь”-ГАЗ уонна УАЗ базатыгар), Lada Niva Travel массыыналар кэчигирээбиттэрин дьон-сэргэ олус сэргээн көрдө.
Араас өҥнөөх шардары массыыналарга иилбиттэрэ тыалга тэлибириир. Бу саҥа массыыналар өрөспүүбүлүкэ оройуоннарыгар бараары тураллар.
— Бүгүн Саха сирин олохтоохторун доруобуйатын тупсарыыга, араҥаччылааһыҥҥа көмө түргэнник тиийэрин туһугар бу саҥа кэлбит массыыналар – «суһал көмө» массыыналара уонна мэдиссиинэ тэрилтэлэригэр ыарыһахтары таһыыга анаммыт массыыналар оройуоннарга айанныахтара. Бу ордук уустук суоллаах-иистээх нэһилиэнньэлээх пууннар олохтоохторугар көмөлөөх буолуоҕа, мэдиссиинэ үлэһиттэрин үлэтин чэпчэтиҕэ, — диэтэ бэйэтин киирии тылыгар өрөспүүбүлүкэ Ил Дархана Айсен Николаев уонна үөрүүлээх быһыыга-майгыга оройуоннар киин балыыһаларын кылаабынай быраастарыгар, солбуйааччыларыгар саҥа массыыналар күлүүстэрин биирдии-биирдии туттарда.
Өрөспүүбүлүкэ Ил Дархана Айсен Николаев, СӨ Бырабыыталыстыбатын Бэрэссэдээтэлин солбуйааччы Ольга Балабкина, СӨ доруобуйа харыстабылын миниистирэ Лена Афанасьева саҥа массыыналары кэрийэн көрдүлэр, быраастары, суоппардары кытта кэпсэттилэр.
РФ Бырабыыталыстыбатын 3713 №-дээх дьаһалынан федеральнай бүддьүөт суотугар Саха Өрөспүүбүлүкэтин наадыйыытыгар В кылаастаах 9 (анал медтэриллэрдээх) суһал көмө массыыналара Алдан Аллараа Кураанах бөһүөлэгэр, Үөһээ Бүлүүгэ, Бүлүүгэ, Мииринэйгэ, Нерюнгригэ, Өймөкөөҥҥө, Жатайга барыахтара.
“2021-2025 сылларга Саха Өрөспүүбүлүкэтин доруобуйа харыстабылын бастакы сүһүөх звенотын саҥардыы” эрэгийиэн бырагырааматын чэрчитинэн 2023 сылга 50 массыына ылыллыахтаах. Манна олоҕуран 12 “Лада Нива Трэвэл” массыынаны ыллылар. Массыыналар ааннарыгар Айхалга, Алдаҥҥа, Үөһээ Бүлүүгэ, Бүлүүгэ, Ленскэйгэ, Мииринэйгэ, Сунтаарга, Уус Алдаҥҥа анаммыттарын туоһулуур суруктаахтар.
Онон бүгүн 21 мэдиссиинэ тырааныспарын оройуоннардааҕы киин балыыһа кылаабынай быраастара туттулар: суһал көмө 9 массыынатын (2 “Соболь-ГАЗ массыына уонна 7 УАЗ), ыарыһахтары тиэйиигэ 12 массыынаны. Бу массыыналар бары Саха сирин тыйыс усулуобуйатыгар үлэлииргэ анаан таҥыллыбыттар. Бэл, суһал көмө массыыната үрдүк буолан, холобура, массыына иһигэр көмөнү ыарыһахха оҥорор эмчит туран эрэ үлэлииригэр табыгастаах. Ыарыһах балыыһаҕа айаннаан тиийэр диэри бастакы көмөнү ыларыгар сөптөөх барыта бу массыына иһигэр баар. Оттон Lada Niva Travel түөрт пациены биирдэ олордон илдьэр эбэтэр сытыаран эрэ илдьэр да кыахтаах гына оҥоһуллубут, биоматериаллары анаалыска да илдьиэҕэ.
Саха Өрөспүүбүлүкэтин салалтата нэһилиэнньэ чэгиэн туруктаах буоларыгар ити курдук бары кыһамньытын уурар.
Хаартыска: ааптар
Саҥа дьыл саҕана үгүс хаһаайкалары бырааһынньык остуола долгутар. Саҥа дьыллааҕы салааттар, ас-үөл барыта сыалаах-арыылаах. Бырааһынньык…
Амма улууһун Соморсун нэһилиэгэр кыстык этэҥҥэ ааһа турар. Хаһаайыстыбаларга 468, пиэрмэрдэргэ 359 сылгы эбии аһылыкка…
Бүгүн, ахсынньы 22 күнүгэр, 13:45 чааска Булуҥ улууһун Бороҕон нэһилиэгин баһылыгын солбуйааччы Биир кэлим диспетчер-дьуһуурунай…
Дьокуускай куоракка тымныы күннэр сатыылаан турар кэмнэригэр сылаас тохтобуллар олус суолталаах буоллулар. Ол курдук, маннык…
Булуҥ улууһугар сүппүт үһүс киһини буллулар диэн Булуҥнааҕы ЕДДС иһитиннэрэр диэн СӨ Быыһыыр сулууспата суруйар.…
Оҕо иммунитетын бөҕөргөтөөрү араас сыаналаах йогуртары талабыт. Күөх экрааҥҥа көстөр араас сыаналаах йогуртар хаһааныллар болдьохторо…