Өрөспүүбүлүкэ күнүгэр аналлаах автопробег ыытылынна

Өлүөхүмэ улууһугар Дьаарханнааҕы национальнай нэһилиэккэ «Көҥүл» эдэр ыччат түмсүүтүн көҕүлээһининэн Саха Өрөспүүбүлүкэтин күнүгэр аналлаах Автопробег  аахсыйа үрдүк күүрүүлээхтик, чахчы даҕаны киһи сүргэтин көтөҕөр гына буолла.

Саха Өрөспүүбүлүкэтин, Арассыыйа былааҕын үөһэ күөрэччи иилиммит, киэргэтиллибит массыыналар холуонналара субуруһа айаннаатылар.

Аахсыйаҕа ыччат эрэ буолбакка, саастаах дьон, улахан кылаастар үөрэнээччилэрэ сахалыы симэнэн кэлбиттэрэ олус кэрэ көстүүнү биэрдэ. Алгыс кэмигэр дьон биир турукка киирдилэр, ол кэнниттэн илии илииттэн ылсан, Эллэй саҕаттан этиллибит эһиэкэйи, Омоллоон саҕаттан оонньонуллубут оһуокайы оройуттан туттубут. Чахчы даҕаны саха омук буолартан киэн туттуу, түмсүүлээх буолуу бу тэрээһиҥҥэ көһүннэ.

Автопробегы тэрийэн, көҕүлээн ыыппыт Борис Басыргасов, Юлиана, Стивен Кудряшовтар саҕалаабыт дьыалалара мэлдьи дьон сэҥээриитин ыла турдун, түбүктээх үлэлэрэ үтүө түмүктээх буоллун. Эдэр дьон саханы саха дэттиннэр, өрөспүүбүлүкэ, оройуон, нэһилиэк сайдыытыгар төһүү күүс буоллуннар.

Саргылаана Худаева, “Эйгэ” сынньалаҥ киин дириэктэрэ.