Айтана Аммосова хаартыската.
Кэлэр 2024 сыл сайыныгар Саха сиригэр норуоттар икки ардыларынааҕы “Азия оҕолоро” спортивнай сайыҥҥы оонньуулар ахсыс төгүлүн ыытыллыахтара. Аҕыс сыл буолан баран төрүттэммит сиригэр эргиллэн ыытыллар оонньууларга анаан өрөспүүбүлүкэҕэ бэлэмнэнии үлэтэ күөстүү оргуйар.
Саҥа тутуулар
Оонньуулар кэмигэр Дьокуускайга 16 эбийиэгинэн көрүҥнэринэн күрэхтэһиилэр ыытыллыахтара, 23 эбийиэгинэн ыалдьыттары олордуохтара уонна 24 эбийиэгинэн аһатыахтара. Бары успуорт эбийиэктэригэр, уопсай дьиэлэргэ уонна уопсастыбаннай сирдэргэ өрөмүөн, саҥардан оҥоруу үлэлэрэ бараллар.
Киин куорат 77-с кыбартаалыгар элбэх хайысхалаах спортивнай комплекс тутуллар. 2,8 тыһыынча кв. м иэннээх икки этээстээх эбийиэккэ 400 миэстэлээх түрүбүүнэлээх универсальнай саала, уус-уран гимнастика саалалара, буоксалыыр саала баар буолуоҕа.
Хатаска эмиэ 400 миэстэлээх саалалаах, буоксалыыр хостоох, таһыгар аһаҕас стадионнаах элбэх хайысхалаах спортивнай саала тутуллан киириэҕэ.
Итиэннэ Дьокуускайга Губин аатынан уулуссаҕа самбо уонна дзюдо саалалара тутуллаллар.
Саҥа сылга – саҥа саала
Хатас нэһилиэгэр «Саха Өрөспүүбүлүкэтигэр физическэй култуураны уонна успуорду сайыннарыы» диэн судаарыстыбаннай уонна «2017-2032 сылларга Дьокуускай куорат социальнай инфраструктуратын биир кэлимник сайыннарыы» муниципальнай бырагыраамаларынан 2 285,36 кв. м иэннээх спортивнай комплекс тутулла турар.
Саҥа спортивнай комплекс икки этээстээх, таһыгар кыра стадионнаах. Тутуу үлэтэ барбыта иккис сыла буолла. Эбийиэк 89% бэлэм турар. Онон үлэ этэҥҥэ болдьоҕор түмүктэннэҕинэ, 2024 сыл тохсунньу 1 күнүттэн оҕолор үөрэ-көтө сабыс-саҥа саалаҕа дьарыктанан саҕалыахтара.
Дьокуускай куорат успуорка уонна физическэй култуураҕа управлениетын начаалынньыга Эдуард Ефимов: «Туох-баар успуорт көрүҥэр барытыгар аналлаах араас саалалар оҥоһуллаллар. Былаан быһыытынан манна 800-тэн тахса оҕо дьарыктаныахтаах. Оҕолор да, олохтоохтор да маннык тупсаҕай, бары ирдэбилгэ эппиэттиир саалаҕа дьарыктанан доруобуйаларын туруга тупсуо, успуорка ситиһиилэри аҕалыахтара диэн эрэнэбит», – диэн кэпсиир. Кини этэринэн, бу саалаҕа эһиил сайын Дьокуускайга ыытыллыахтаах «Азия оҕолоро» спортивнай оонньууларга кыттар сүүмэрдэммит хамаанда чилиэннэрэ дьарыктанан саҕалыахтаахтар.
Эбийиэк бастакы этээһигэр волейболлуур, баскетболлуур, футболлуур былаһааккалар тутуллуохтара. Иккис этээскэ буокса, тустуу саалата уонна дьаһалта хоһо баар буолуоҕа. Маны таһынан, өссө хас да атын көрүҥҥэ анаммыт саалалар эмиэ оҥоһуллуохтара.
Тутуу үлэтин көрө сылдьан Хатастааҕы ДЮСШ тириэньэрэ Анатолий Баишевы көрсөн кэпсэттибит. Кини, өрөспүүбүлүкэ, судаарыстыба өттүттэн өйөбүл баар буолан, Хатас оҕолоро, олохтоохторо тутуу бара турарыттан олус үөрэллэрин, дьарыктаах буолуохтарын туһунан кэпсээтэ. Хатаска 1985 сыллаахха тутуллубут аарка быһыылаах успуорт саалата баара 2016 сыллаахха уокка былдьаммыт эбит. Онон билигин 300-чэ оҕо эргэ оскуоланы саала оҥостон дьарыктанар. ДЮСШ-ҕа алта тириэньэр үлэлиир. Оҕолор ордук сөбүлээн волейболунан, тустуунан, мас тардыһыытынан, хайыһарынан дьарыктаналлар диэн тириэньэр кэпсиир.
Хатастан өрөспүүбүлүкэҕэ киэҥник биллэр волейболистар, мадьынылар, многоборецтар, хайыһардьыттар тахсыбыттара. Онон саҥа саалаҕа дьарыктанан өссө да үрдүк ситиһиилэр кэлэ туруохтарын саарбахтаабаппыт.
Бэрэсидьиэн ыйбыт соруктарынан
Арассыыйа Бэрэсидьиэнэ Владимир Путин 2024 сылга дойду нэһилиэнньэтин ачаабыта 55%-а успуордунан утумнаахтык дьарыктанар буолуохтаах диэн соругу туруорбута.
“Маассабай успуорду көхтөөхтүк сайыннарыахха, оҕону кыра сааһыттан физическэй култуураҕа сыһыарыахха, улахан дьоҥҥо успуорка интэриэс тардыахха уонна наадалаах инфраструктураны тэрийиэххэ наада”, – диэн Владимир Путин эппитэ.
Эбийиэктэр тутуллаллар, үлэ салҕанар
Инньэ гынан, биэс сыл устата, 2019 сылтан 2024 сылга диэри Саха сиригэр араас бырагыраамаларынан, ол иһигэр “Демография” национальнай бырайыагынан барыта 32 успуорт эбийиэгэ тутуллубута. Онтон 10 улахан успуорт эбийиэгэ тутулларыгар былаан турбута, алта эбийиэгэ номнуо тутуллубута.
Аҥаардас 2022 сылга Ньурба улууһун Антоновкатыгар успуорт саалата, Жатай бөһүөлэгэр сөтүөлүүр бассейн, Мэҥэ Хаҥалас улууһун Аллараа Бэстээххэ бассейннаах успуорт комплекса, Горнай улууһун Бэрдьигэстээҕэр элбэх хайысхалаах успуорт саала, Уус Алдан улууһун Мындаабатыгар спортивнай единоборстволар универсальнай комплекстара, Бороҕоҥҥо чэбдигирдэр-спортивнай комплекс үлэҕэ киирбит.
Билигин түөрт эбийиэк тутуллар. Эһиил үлэҕэ киирэллэрэ былааннанар.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…