Саха сирин улахан аҥаарыгар халлаан сылыйыаҕа
Красноярскай кыраайтан кэлэр циклоннар өрөспүүбүлүкэ улахан аҥаарыгар хаары уонна сылаас күннэри аҕалыа.
Саха сирин соҕуруулуу-арҕаа өттүгэр салгын температурата +1С кыраадыска тиийэ сылыйыа. Бу күннэргэ күн-дьыл туруга хайдах буоларын туһунан Саха сиринээҕи УГМС отделын начаалынньыга Саргылана Никитина кэпсээтэ.
«Бу күннэргэ өрөспүүбүлүкэ соҕуруулуу-арҕаа уонна соҕуруу өттүгэр сылыйыа. Күнүс салгын температурата 0…-5С кыраадыс буолара сабаҕаланар, сорох улуустарынан +1С кыраадыска тиийэ сылыйыа. Салгын температурата үрдүүрэ киин оройуоннарга эмиэ күүтүллэр. Күн-дьыл туруга Красноярскай циклонтан быһаарыллыаҕа», — диэн Саргылана Никитина кэпсээтэ.
Киин улуустарынан синоптик салгын температурата үрдүүрүн чэппиэргэ билгэлиир. Салгын температурата -4..-9С кыраадыс тымныы буолуоҕа диэн эрэннэрдилэр.
«Ол гынан баран өрөбүллэргэ хаттаан -13С диэри тымныйар. Соҕуруулуу-арҕаа уонна соҕуруулуу-илин хаар түһэрэ күүтүллэр. Оттон республика хотугулуу-илиҥҥи өттүгэр тымныы күн-дьыл туруо, сорох сиринэн түүнүн -30С…-35С тиийэ тымныйыа», — диэн эспиэр иһитиннэрдэ.
Саргылана Никитина бэлиэтииринэн, сэтинньи саҥатыгар Саха сирин киин оройуоннарыгар -30С кыраадыстаах тымныылар түһүөхтэрэ.
Сообщить об опечатке
Текст, который будет отправлен нашим редакторам: