Өрөспүүбүлүкэ ыччата 1 мөл. солк. диэри грант ылыахтарын сөп

Кулун тутар 14 күнүттэн «Муус Устар» ыччат өрөспүүбүлүкэтээҕи бэстибээлин чэрчитинэн эрэгийиэннээҕи Росмолодежь.Граннар куонкурус биллэриллибитэ.

Сайаапкалары 2025 сыл муус устар 14 күнүгэр Москва куорат бириэмэтинэн күнүс 13:00 чааска диэри ылыахтара.

«Саха Өрөспүүбүлүкэтэ эрэгийиэннэртэн Арассыыйаҕа грант былаһааккатын үлэтин аан бастакынан саҕалаан биллэрбитэ. Ыччат бэйэтин кыаҕын олоххо киллэрэн, бырайыактары көҕүлээччилэр үп-харчы өйөбүлүн ылан,  улахан өйөбүлүнэн туһаныахтарын сөп.  Граҥҥа 14-35 саастаах ыччат үбүлээһининэн туһанар кыахтаах. Өйөбүл 5 тыһыынча солкуобайтан 1 мөлүйүөн солкуобайга диэри оҥоһуллар. Хас биирдии кыттааччы 18 номинацияттан биирдэстэригэр биирдии сайабылыанньаны, ол иһигэр биир бырайыагы талыан сөп», — диэн СӨ Бырабыыталыстыбатын Бэрэссэдээтэлин солбуйааччы Ольга Балабкина бэлиэтээн эттэ.

Сайаапкалары маннык  бырайыактарга (барыта 18 хайысха) биэриэххэ сөп:

• – ыччат дьарыктаах буолуутун, ол иһигэр бэйэ дьарыктаах буолуутун тэрийэргэ туһуламмыт бырайыактар;
• – кыра территориялары сайыннарыыга туһуламмыт бырайыактар;
• – доруобуйаларынан хааччахтаах дьону кытта үлэлииргэ туһуламмыт бырайыактар;
• – экологическай үөрэхтээһиҥҥэ туһуламмыт бырайыактар;
• – орто анал үөрэх кыһаларын устудьуоннарын түмсүүтүн өйүүргэ уонна сайыннарарга туһуламмыт бырайыактар;
• – айар көҕүлээһиннэри өйүүргэ уонна култуурунай-үөрэх эйгэтин сайыннарарга туһуламмыт бырайыактар;
• — ыччат туризмын сайыннарыыга туһуламмыт бырайыактар;
• – историческай өйдөбүлү харыстыырга туһуламмыт бырайыактар;
• – дьиэ кэргэн сыаннастарын харыстыырга туһуламмыт бырайыактар —  уо.д.а.

Сайабылыанньа «Арассыыйа ыччата» федеральнай судаарыстыбаннай автоматизированнай информационнай систиэмэҕэ туттарыллыахтаах, биирдиилээн дьоҥҥо аналлаах методическай сүбэни тутуһуу ирдэнэр.

Сиһилии ФГАИС «Юность России» сигэтинэн билсиҥ.