Өрөспүүбүлүкэҕэ 700-тэн тахса киһи клещка  ытыттарбыт

Атырдьах ыйын 14 күнүнээҕи туругунан, өрөспүүбүлүкэ 19 оройуонугар уонна Дьокуускайга 701 киһини клещ ытырбыт түбэлтэтэ бэлиэтэннэ. Бу туһунан Саха сиринээҕи Роспотребнадзор иһитиннэрэр.

Ол иһигэр 26 клещка ытыттарыы түбэлтэтэ Амурскай, Иркутскай, Тула, Запорожье, Калининград уонна Новосибирскай уобаластартан, ону таһынан Хабаровскай, Приморскай, Ставропольскай, Забайкальскай уонна Красноярскай кыраайдартан киллэриллибит.

Клещка ытыттарбыт дьон быраастарга көрдөрүнүүлэрэ ордук элбэхтик Ленскэй улууһугар — 319, Алдан улууһугар — 128, Нерюнгри оройуонугар — 93, Дьокуускайга — 53 уонна Өлүөхүмэ улууһугар — 50 түбэлтэ бэлиэтэннэ.

Клещка ытыттарбыт 701 киһиттэн 540-гар клещтан утары иммуноглобулин быһыыта туруоруллубут, оттон 114 киһи клещ энцефалитыттан быһыыны ылбыт.

Суһал дааннайынан, уопсайа 16 194 киһи, ол иһигэр 3 480 оҕо, быһыыны ылбыттар.