Өрөспүүбүлүкэҕэ  доруобуйа харыстабылын дьоҕус эбийиэктэрэ салгыы тутуллаллар

2024 сыл бүтүөр диэри өрөспүүбүлүкэ улуустарыгар мэдиссиинэ 10 пуунун олоххо киллэрии былааннанар.

“Доруобуйа харыстабыла” национальнай бырайыак бастакы сүһүөх звенотун модернизациялааһын бырагырааматынан,  биэлсэр-акушер пууннара уонна быраас амбулаториялара Уус Алдан улууһун Бээдитигэр, Хаҥалас Чапаевотыгар, Мэҥэ Хаҥалас Суола-Мэлдьэхситигэр, Нуораҕанатыгар,  Амма Бөтүҥэр, Бүлүү Илбэҥэтигэр, Нам Хатаһыгар, Таатта Кыйытыгар, Чурапчы дириҥэр тутуллаллар.

«Билигин 10 ФАП-тан уонна быраас амбулаториятыттан 7 эбийиэк тутуута хайыы үйэ 100%  бэлэм. Уопсайынан, 5 сыл иһигэр Саха сиригэр хаһааҥҥытааҕар да элбэх эбийиэк – 80 биэлсэр-акушер пууннара уонна амбулаториялар ыраах сытар нэһилиэнньэлээх пууннарга тутуллан үлэҕэ киллэрилиннилэр. Саҥа пууннар наадалаах тэриллэринэн толору сэбилиннилэр, ону таһынан мэдиссиинэ өҥөтүн хаачыстыбалаах оҥорорго теле-мэдиссиинэ көмөтүнэн сүбэ-ама биэрэр кыах баар”, — диэн доруобуйа харыстабылын миниистирэ Лена Афанасьева иһитиннэрдэ.

Санатан эттэххэ, “Доруобуйа харыстабыла” национальнай бырайыак Арассыыйа Бэрэсидьиэнэ Владимир Путин көҕүлээһинэн олоххо киллэриллэр.