Уһуйааччы сылын аһыллыыта. СИА.
Бүгүн, үөрэх үлэһиттэрин Тохсунньутааҕы мунньаҕын иитинэн, саха тыйаатырыгар Арассыыйаҕа Уһуйааччы сыла аһыллыытын дьоро тэрээһинэ уонна РФ норуодунай учуутала Виктор Потаповы чиэстээһин буолла.
Ил Дархан Айсен Николаев: “Арассыыйаҕа Педагог уонна уһуйааччы сылынан бука барыгытын эҕэрдэлиибин. Бу анал сорук биһиги өрөспүүбүлүкэбитигэр күүстээх хамсааһыны таһаарыа, үтүөлээх түмүктэри аҕалыа диэн эрэнэбин. Алтыһар кэмнэригэр билиини, киһи уонна гражданин бастыҥ хаачыстыбаларын иҥэрэр дьиҥнээх педагогу, уһуйааччыны олоҕун суолугар көрсүбүт киһи — дьоллоох киһи. Мин бэйэбин биир оннук дьоллоох киһинэн ааҕынабын. Бүгүн учууталбын, ытыктабыллаах Виктор Филиппович Потаповы уруйдуу көрсөбүн. Уонна “РФ норуодунай учуутала” ааты ылбытынан эҕэрдэлиибин. Виктор Филиппович 2022 сылга Арассыыйаҕа үрдүк наҕарааданы ылбыт соҕотох педагогунан буолар”, — диэн эҕэрдэтин тиэртэ.
Сүүһүнэн оҕоҕо билим билиитин киэҥ аартыгын арыйбытын эттэ. Ол курдук, “Туймаада” норуоттар икки ардыларынааҕы олимпиада солбуллубат тэрийээччитэ буоларын аҕынна.
Уһуйааччы сыла саҥа киллэриини утумнааһын үтүө сылынан буолуоҕар эрэнэрин биллэрдэ. Эдэрдэри уһуйууга өрөспүүбүлүкэҕэ үтүө холобур баарын эттэ. Киэҥ билиилээх дойду дьиҥнээх патриоттарын иитэн таһаарыы – биһиги барыбыт сорукпут буолар диэн чопчулаата. Бу инниттэн үөрэх хаачыстыбатын, педагогтар маастарыстыбаларын үрдэтии, уһуйуу уонна бастыҥ уопут сүҥкэн суолталаахтарын бэлиэтиир.
Уһуйааччы сылынан 36 бастыҥ уһуйааччы-педагогка 100-түү тыһ. солк. суумалаах Ил Дархан бириэмийэтин олохтуур туһунан быһаарыы ылыммытын иһитиннэрдэ. Бастыҥ учуутал Виктор Филиппович Потаповка үрдүк ытыктабыл, махтал бэлиэтигэр 1 мөл. солк. суумалаах биир кэмнээх харчынан бириэмийэ туттарылларын эттэ.
Саха сиригэр Уһуйааччы сылын ыытыыга өрөспүүбүлүкэтээҕи тэрийэр кэмитиэт бэрэссэдэтээлэ, Бырабыыталыстыба бэрэссэдээтэлин солбуйааччы Сергей Местников Уһуйааччы сылыгар бэлэмнэнии өссө ааспыт сылтан саҕаламмытын, тэрээһиннэр былааннарын оҥорон бигэргэппиттэрин санатта. “Кэлиҥҥи сылга үөрэх хаачыстыбатын, педагог идэтин үрдэтиигэ өрөспүүбүлүкэҕэ дьоһуннаах хардыы оҥоһулунна, куоракка үөрэх улахан комплекстара, тыа сиригэр хаачыстыбатынан уонна хааччыллыытынан куораттан итэҕэһэ суох оскуолалар, уһуйааннар тутуллаллар. Национальнай бырайыагынан оскуолалары аныгы тэрилинэн хааччыйыы барар. Билигин биһиги сорукпут – педагог идэтин таһымын үрдэтии. Уһуйааччы сыла манна туһаайыллар, педагогтары социальнай уонна материальнай өттүнэн өйүүргэ туһаайыллар, кинилэр идэлэрин, маастарыстыбаларын үрдэтиигэ. Бастатан туран, педагогическай үлэһиттэргэ сыһыаннаах сокуон ылыллыаҕа. Ил Дархан бириэмийэтэ олохтонно, түөскэ иилинэр бэлиэ оҥоһулунна, “Саха сирин педагога” бырайыак олоххо киириэҕэ”, — диэн эттэ.
Виктор Филиппович Потапов 9 үөрэнээччитэ биир кэлим эксээмэҥҥэ 100 баалы ылбытын, үөрэнээччилэрэ норуоттар икки ардыларынааҕы олимпиадаларга тиийэ кыайалларын, миэстэлэһэллэрин аҕынна. Үөрэппит оҕолоро өрөспүүбүлүкэ, дойду таһыма сайдыытынан эрэ муҥурдамматтарын, киэҥ сураҕыралларын, физикаҕа, тиэхиньикэҕэ хандьыдаат буолбуттар ахсааннара сыллата эбиллэн иһэрин санатта.
Дьокуускай куорат күнүн көрсө мээр Евгений Григорьев суруналыыстары мунньан пресс-конференция ыытта. Тэрээһин быйыл күһүн үлэҕэ…
Сайыҥҥы уһун сынньалаҥнар кэннэ үлэ, үөрэх дьыла саҕаланыыта дьиэ кэргэн бүддьүөтүгэр улахан хамсааһын тахсар. Маныаха…
Ханнык баҕарар норуокка инники сайдыыны быһаарар күүһүнэн дойдуларын туһугар күүскэ, бэриниилээхтик үлэлии сылдьар, сайдыы суолун…
Үөрэх үгүс кыһаларыгар оҕолор икки ардыларыгар араас сыһыан баар буолар. Доҕордоһуу, кэпсэтии, тэрээһиннэргэ кыттыы, ону…
Аныгы үйэҕэ күннээҕи олохпутугар туох буортулааҕын, киһи этигэр-сиинигэр хайдах дьайарын биллэхпитинэ, быһаарыстахпытына эрэ, бэйэбит уонна…
Оҕону көрөргө уоппусканы ийэ эрэ ылыахтаах диэн буолбатах. Сокуон быһыытынан аҕа, эбээ, эһээ, атын аймахтар…