Өрөспүүбүлүкэҕэ үөрэх тэрилтэтин 98,8% саҥа үөрэх дьылыгар бэлэм

Саха сиригэр саҥа үөрэх дьылын көрсө үөрэх тэрилтэлэрин бэлэмнээн туттарыы үлэтэ түмүктэнэн эрэр. Атырдьах ыйын 20 күнүнээҕи туругунан өрөспүүбүлүкэ үөрэҕин тэрилтэлэрин 98,8% саҥа үөрэх дьылыгар бэлэм.

Күн бүгүн Саха сиригэр баар 630 оскуолаттан 623 оскуола оҕолору үөрэтэргэ олоччу бэлэм, “Оскуола үөрэҕин систиэмэтин саҥардыы” федеральнай бырагыраама усулуобуйата ирдиирин курдук, алта оскуоланы атырдьах ыйын 31 күнүгэр диэри туттарыахтара. Сааскы халаан уутуттан эмсэҕэлээбит Нам улууһун Маймаҕа оскуолатын өрөмүөнэ атырдьах ыйын 31 күнүгэр диэри түмүктэниэҕэ.

Өрөспүүбүлүкэ бары 43 орто анал үөрэҕин тэрилтэтэ устудьуоннары ыларга бэлэм. Ону тэҥэ, Саха сирин 176 эбии үөрэхтээһинин тэрилтэтэ саҥа үөрэх дьылыгар бэлэм.

Санатан аастахха, Саха сирэ кэлиҥҥи 6 сылга оҕо билиини иҥэринэригэр үөрэх аныгы эйгэтин, усулуобуйатын тэрийиигэ улахан хардыыны оҥордо.  “Үөрэхтээһин” национальнай бырайыак иитинэн 51 оскуола үлэҕэ киирдэ, быйыл өссө 18 эбийиэги тутан бүтэрэр былааннаахтар.

Ил Дархан уонна Бырабыыталыстыба пресс-сулууспата.