Өрөспүүбүлүкэтээҕи «Байанай күрэҕэ-2023» Намҥа ыытылынна

Share

Муус устар 1 күнүгэр Нам улууһун Бастакы Хомустаах нэһилиэгэр  XXVI өрөспүүбүлүкэтээҕи  «БАЙАНАЙ КҮРЭҔЭ – 2023» үрдүк таһымнаахтык буолан ааста.

Күрэххэ Амма, Таатта, Мэҥэ Хаҥалас, Чурапчы, Бүлүү, Ньурба, Горнай, Хаҥалас, Нам улуустарыттан уонна Хатастан саха саарыннара, айылҕа оҕолоро, булка-алка сылдьар эр хоһууттара илин-кэлин түсүһэн бастыҥнары быһаарыстылар.

Тэрээһини сахалыы сиэринэн алгысчыт аал уоту оттон, алаадьынан аһатан айыылартан көрдөстө. Ол кэннэ хамаандалар парадтаан киирдилэр.

Күрэхтэһэ кэлбит дьону Бастакы Хомустаах нэһилиэгин баһылыга Василий Жирков, улуус депутаттарын Сэбиэтин председателэ Алексей Винокуров уонна «Русский охотничий» сурунаал кылаабынай редактора, зоолог, охотовед, суруйааччы, Уһук Илин суруналыыһа Михаил Кречмар, күрэхтэһии кылаабынай судьуйата, СӨ экология, айылҕаны туһаныы уонна ойуур хаһаайыстыбатын миниистирин солбуйааччы Николай Додохов эҕэрдэлээтилэр, ситиһиилэри баҕардылар.

Михаил Кречмар саха булчуттарыгар сүгүрүйэрин биллэрдэ уонна «Русский охотничий» биир нүөмэригэр бүттүүн Саха сирин булчуттарын, балыксыттарын туһунан таһаарыахпыт диэн кыттааччылары да, көрөөччүлэри да олус үөртэ.

Хаартыска:«Нам улууһа» МТ пресс-сулууспата

Күммүт-дьылбыт туруга туран биэрдэ: кыратык хаардаан да ылла, ол кэнниттэн силлиэрэн илгистэн турбут халлааммыт күнүн көрдөрөн сылааһынан илгийдэ. Онон, күрэхтэһэргэ сөрү-сөп буолла. Бэрт тыҥааһыннаах, киирсиилээх, күөн көрсүүлээх түһүмэхтэр буоланнар, уопсай түмүк маннык буолла:
1 миэстэ – Чурапчы улууһа;
2 миэстэ – Мэҥэ Хаҥалас улууһа;
3 миэстэ  – Бастакы Хомустаах, Нам 2-с хамаандата.

Кыайыылаахтары уонна призердары Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис комитетын председателэ, норуот депутата Сахамин Афанасьев, СӨ ойуур хаһаайыстыбатын, айылҕа баайын туһаныыга уонна экологияҕа министерствотын иһинэн булт хаһаайыстыбатын уонна айылҕа уратын харыстанар сирдэрин департаменын салайааччытын солбуйааччы Анатолий Попов, улуус баһылыгын тыа хаһаайыстыбатыгар солбуйааччы Филипп Николаев, Бастакы Хомустаах нэһилиэгин баһылыга Василий Жирков грамоталарынан, мэтээллэринэн, сыаналаах бириистэринэн наҕараадалаатылар.

Ону сэргэ Байанай күрэҕин төрүттээччи, сылын аайы бириис олохтуур Потап Павлов үһүс миэстэни ылбыт хамаандаҕа булт маҕаһыыныгар 25 тыһ.солк. сертификат, иккискэ тайахха лицензия уонна бастаабыттарга убаһа сертификатын туттартаата.

Кыттааччылар күрэхтэһии үрдүк таһымҥа ыытыллыбытыгар Нам улууһун, Бастакы Хомустаах нэһилиэгин дьаһалталарыгар, сүүрбүт-көппүт тэрийээччилэргэ, дьоҥҥо-сэргэҕэ махталларын тиэртилэр. Күрэҕи Нам улууһун булчуттарын уонна балыксыттарын обществоларын салайааччыта Иван Яковлев комментатордаан кыттааччылары да, көрөөччүлэри да олус сэргэхситтэ.

Маннык күрэх сыллата ыытыллара хайҕаллаах суол. Нэһилиэнньэҕэ булду  тарҕатыы, үүнэр көлүөнэни булт-алт төрүт үгэстэригэр иитии, сыһыарыы буолар. Төһө да сайдыылаах олоххо олордорбут өбүгэлэрбит илдьэ кэлбит үгэстэрин умнубат, салгыы сайыннарар ытык иэспит буолар.

«Нам улууһа» МТ пресс-сулууспата

What’s your Reaction?
+1
0
+1
0
+1
0
+1
0
+1
0
+1
0
+1
0

Recent Posts

  • Быһылаан
  • Сонуннар

Массыыналаах гараас умайда

Бүгүн, ыам ыйын 2 күнүгэр, сарсыарда  08:18 чааска баһаарынай-быыһыыр сулууспаҕа Нерюнгри оройуонун Чульманыгар  Совхознай уулуссаҕа…

10 минут ago
  • Култуура
  • Сонуннар

«Биһиги Димабыт» айар киэһэтигэр дуоһуйа сынньанныбыт

Муус устар 29 күнэ  -  Үҥкүү аан дойдутааҕы күнэ. Бу бэлиэ тэрээһиини Сергей Зверев-Кыыл Уолун…

42 минуты ago
  • Сонуннар
  • Уопсастыба

Киин куоракка «Өлбөт үйэлээх полк» аахсыйа атын ньыманан ыытыллыаҕа

Быйыл үгэскэ кубулуйбут «Өлбөт үйэлээх полк» тэрээһини Арассыыйа үрдүнэн атын ньыманан ыытарга быһаарыы ылыммыттара. СИА…

1 час ago
  • Сонуннар
  • Уопсастыба
  • Үөрэх

Саха тылын, литэрэтиирэтин бастыҥ кэбиниэттэрин күрэһэ

Саха тылын учууталларын айар үлэлэрин сайыннарар, биридимиэти үөрэтэргэ саҥаны киллэриини, технологияны туһаныыны өйүүр хайысхалаах, 2024…

2 часа ago
  • Сонуннар
  • Уопсастыба

Мас бэлэмнээһинигэр субуотунньуктаатылар

Бу аҕыйах хонуктааҕыта Өлөөн улууһун Кирбэй нэһилиэгэр Күөх Маайы уонна Үлэ күнүн уруйдаан, Маайыҥда үтүө…

2 часа ago
  • Сонуннар
  • Хаартыска/Видео

ВИДЕО: Хара кыталыктар дьолго көстөллөр дуо?

Саха сирин олохтооҕо хара кыталыктар үҥкүүлэрин видеоҕа устубута социальнай ситимҥэ тарҕанна. Кыталык үҥкүүтүн  толору дьоллоох …

2 часа ago