Өрөспүүбүлүкэтээҕи харах балыыһата улуус быраастарын үөрэтэр

Ил Дархан Айсен Николаев Өрөспүүбүлүкэтээҕи харах балыыһатыгар быраастары уонна ыарыһахтары кытта көрүстэ.

Кулун тутарга Ил Дархан балыыһа салайааччытын Иван Луцканы кытта көрсөн кэккэ сорудахтары биэрбитэ. Онон бу көрсүһүүгэ Айсен Николаев сорудахтар хайдах толоруллан иһэллэрин бэрэбиэркэлээтэ.

Саҥа атыылаһыллыбыт аныгы тэриллэр хайдах үлэлииллэрин уонна телемэдиссиинэ ньыматынан үөрэх хайдах барарын көрдөрдүлэр. ZEISS VisuMax лазерынан эмтиир тэрил бу балыыһаҕа соторутааҕыта аҕалыллыбыта. Быһаарылларынан, бу эппэрээссийэ оҥорорго туһаныллар.

Маны сэргэ, Ил Дархан улуус быраастарын кытта тэйиччиттэн сүбэни-аманы оҥорууну туоһуласта. Иван Луцкан маннык үлэҕэ анаан, киин балыыһа лиссиэнсийэ ылбытын эттэ. Билигин Дьокуускайга 20 биэлсэр уонна сиэстэрэ оптометрия хайысхатыгар үөрэнэ сылдьаллар. Кинилэр Горнай, Алдан, Кэбээйи, Эдьигээн, Уус Маайа, Уус Алдан, Дьааҥы уонна Мэҥэ Хаҥалас киин балыыһаларыгар үлэлииллэр. Эмтиир быраастар эмиэ үөрэнэллэр. Ааспыт нэдиэлэҕэ глаукоманы эмтээһиҥҥэ аналлаах кэмпириэнсийэ буолан ааспыта.