Өрөспүүбүлүкэтээҕи харах балыыһатын стационарнай отделениета аһылынна

Ил Дархан Айсен Николаев харах балыыһатын стационарнай отделениета аһыллыытыгар, тэрилтэ өрөспүүбүлүкэҕэ доруобуйа харыстабылын сайдыытыгар ситиһиилээх үлэтин бэлиэтээтэ.

Бу үөрүүлээх тэрээһиҥҥэ Ил Дархан ытыс тыаһыгар доҕуһуоллатан, көһө сылдьан үлэлиир көлө күлүүһүн туттарда.

«Маннык мобильнай комплекстар оройуоннар кииннэригэр, куораттар тастарыгар дьон доруобуйатын миэстэтигэр тииийэн көрөргө олус наадалаахтар. Биһиги киин офтальмологическай балыыһабыт улуустарга тиийэ өҥөнү оҥорор. Бу олус наадалаах, туһалаах. 40 куойкалаах саҥа стационарнай отделение баар буолбутуттан үөрэбин«, — диэтэ Ил Дархан Айсен Николаев.

Кини кылаабынай быраас Иван Луцкаҥҥа, харах балыыһатын кэлэктиибигэр ДНӨ үлэлэрин иһин махтанна.

«Өр кэмҥэ мэдиссиинэ судургу өҥөтүнэн кыайан туһанар кыахтара суох олорбут дьоҥҥо биһиги быраастарбыт тиийэн көмөлөһүүлэрэ үтүө холобур буолар. Эһиги кыһамньыгытынан дьон көрөрө тубуста, этэҥҥэ буоллулар«, — диэн этэр Ил Дархан.

Өрөспүүбүлүкэтээҕи офтальмологическай килиниичэскэй балыыһа кылаабынай бырааһа Иван Луцкан күнүскү стационар хараҕы эмтииргэ үчүгэй көрдөрүүлээх Арассыыйаҕа оҥоһуллубут тэрилинэн хааччыллыбытын этэр.

«Биһиги туруоруллубут соруктарга тиһиктээхтик ылсабыт. Бу соруктар элбэх хайысхалаахтар. Бу бастакы сүһүөх мэдиссиинэ көмөтүн оҥоруу, харах ыарыытын быһаарыы, хирургия. Үлэни сайыннаран иһэр туһуттан, РФ Бэрэсидьиэнэ В.Путин көҕүлээбит «Доруобуйа харыстабыла» национальнай бырайыагынан, араас бырагыраамаларга хайысхаларынан кыттабыт. Манна даҕатан эттэххэ, «Нэһилиэнньэҕэ офтальмологическай көмөнү оҥоруу» диэн үс сылга суоттаныллыбыт, дойдуга Саха сирэ аан бастакынан ылсыбыт бырагыраамата баар. Ол бырагыраама олоххо киириитин түмүгүн бу көрөбүт«, — диир кини.

Кылаабынай быраас СӨ Ил Дарханыгар Айсен Николаевка, Бырабыыталыстыбаҕа, СӨ Доруобуйа харыстабылын министиэристибэтигэр туруоруллубут сыалы-соругу ситиһэргэ көмөлөрүн, өйөбүллэрин иһин махтанна.

—-Мин сэттэ сылы быһа араас балыыһаларга эмтэнним. Москваҕа эмиэ. Итиэннэ биһиги балыыһабыт баазата Москва биллэр-көстөр балыыһаларыттан ордук диэн этиэхпин баҕарабын. Онно эргэ балыыһаҕа балаатаҕа сүүрбэлии киһи сытар. Оттон манна — иккилии киһи. Саҥа миэбэл, минньигэс аһылык. Биэлсэрдэри, сиэстэрэлэри бэлиэтиэхпин баҕарабын. Быраастар, хирурдар эмиэ олус болҕомтолоохтор. Кэлэктиипкэ барытыгар, тэхэньиичэскэй үлэһиттэргэ барыларыгар махтанабын. Күҥҥэ балаатаны уонна хомуйаллар, сууйаллар-сотоллор, салгылаталлар«, — диэн эмтэнээччи Роман Дмитриев санаатын үллэстэр.

Уопсайа 40 сытар миэстэлээх саҥа стационарнай отделение мэдиссиинэ көмөтүн кэҥэтэр, күүһүрдэр соруктаах арылынна. Балыыһаҕа олус элбэх катаракталаах киһи кэлэр. Онон ыарыһахтарга табыгастаах буоларын курдук, балыыһа кэҥэтиллэн саҥа стационарнай отделениеланнылар. Бу балыыһа сүрүн дьиэтин кытары холбоммут. Отделение хас биирдии балаататыгар сытар, эмтэнэр дьоҥҥо табыгастаах усулуобуйа тэриллибит. Манна холодильниктаахтар, тэлэбиисэрдээхтэр, мэдиссиинэ үлэһиттэрин ыҥырар кунуопкалаахтар. Этиллэринэн манна өссө күнүскү стационар былааннанар.

«Газель» баазатыгар «Офтальмология» көһө сылдьар мэдиссиинэ комплекса «Биир ньыгыл Арассыыйа» баартыйа бырайыагын олоххо киллэриинэн, инникибит чөл, чэгиэн буоларыгар уонна Ил Дархан Айсен Николаев сорудаҕын толоруу чэрчитинэн  ылыллыбыт. Миэстэтигэр айаннаан тиийэн дьон доруобуйатын көрүү эрэгийиэҥҥэ туһалаах уонна наһаа наадалаах. Мобильнай хос ачыкыны таларга, хараҕы көрөргө, эмтииргэ көмөлөһөр аналлаах.  Мобильнай комплекс өрөспүүбүлүкэ чугас нэһилиэктэригэр улуустар киин балыыһаларын кытары сүбэнэн оҥоһуллубут кыраапыгынан үлэлиэ.

Сиһилии https://www.sakha.gov.ru/news/front/view/id/3397053   ааҕыаххытын сөп.

СӨ Ил Дарханын уонна Бырабыыталыстыбатын пресс-сулууспата

Хаартыскаларга Андрей Сорокин түһэриитэ, СИА