Өрөспүүбүлүкэтээҕи күөн күрэс икки түһүмэҕинэн ыытылынна

«Төрүт тыл» сахалыы үлэлиир логопедтар мэтэдиичэскэй холбоһуга тэрийбит «Төрөөбүт төрүт тылы көннөрөн сайыннарыыга аналлаах мэтэдиичэскэй босуобуйалар, бэйэ айбыт оонньуулара» өрөспүүбүлүкэтээҕи күөн күрэс икки түһүмэҕинэн ыытылынна.

Бастакы түһүмэх сэтинньи 14 күнүгэр кэтэхтэн үлэлэри көрүү, иккис түһүмэххэ аһарыы. Манна Дьокуускай куораттан, Мэҥэ Хаҥаластан, Тааттаттан, Чурапчыттан, Амматтан, Уус Алдантан, Намтан, Сунтаартан, Үөһээ Дьааҥыттан барыта 48 үлэ киирбитэ. Иккис түһүмэххэ, ахсынньы 12 күнүгэр, Дьокуускай куоракка SMART бибилэтиэкэ дьиэтигэр 22 кыттааччы 31 үлэтэ быыстапкаҕа турда. 7 үлэ кэтэхтэн көрүлүннэ. Дьүүллүүр сүбэҕэ ХИФУ ПИ преподавателэ Семенова Л.А., «Төрүт тыл» түмсүү салайааччыта Спиридонова М-Э.А., уопуттаах логопед учууталлар «Туллукчаан» уһуйаантан Ширяева Л.И., «Ромашка» уһуйаантан Романова Ф.Е., Майатааҕы социальнай тэрилтэ микрореаблитационнай кииниттэн Титова Е.Н., Дьокуускайдааҕы гимназияттан Кузьмина М.М., Ытык Күөллээҕи “Чуораанчык” оҕону сайыннарар киинтэн Хаптагаева Т.Г., Чурапчытааҕы «Мичил» уһуйаантан Жиркова М.Д. икки хайысхаҕа арахсан үлэлэри көрдүлэр, сыаналаатылар.

Түмүк:

1 миэстэ — Гоголева П.Е. «Толкуйдаа, оонньоо, ситис» оҕону сайыннарар оонньуута, Христофорова М.П. «Дорҕооннору дьүөрэлээн» оонньуута,

2 миэстэ — Борисова М.В. «Дорҕоон дуола», Винокурова М.С., Босикова М.Р., Корякина С.И. «Дорҕооҥҥо бастакы хардыылар» үлэлиир тэтэрээт,

3 миэстэ — Ушницкая О.Ю., Омукчанова У.В. «Холбука» оҕо саҥатын сайыннарар оонньуулара, Попова Н.С. «Олоҥхо оһуорун дойдута” холбуката таҕыстылар.

«Бастыҥ босуобуйа» анал аат — Халыева Х.Г. «Дорҕоон миэстэтин бул» оонньуута, Федорова Е.П. оонньууларын хомуурунньуга,

«Ураты толкуйдатар босуобуйа» анал аат —  Яковлева Е.Н. «Сырыс» босуобуйата, Шадрина А.П. «Дорҕоон хонуута» босуобуйата,

«Бастыҥ ньымалаах босуобуйа» анал аат —  Горохова А.Г. «Сөпкө ааҕыахха, суруйуохха” оҕо үлэлиир тэтэрээтэ, Алексеева М.В., Алексеева А.Д. «Сэмэнчик» үлэлиир тэтэрээт ыллылар.

Оҕо тылын сайыннарарга араас оонньуулары, босуобуйалары айан таһааран үлэлэригэр тутталлара олус кэрэхсэбиллээх.

Т.Г. ХАПТАГАЕВА, Таатта улууһун Ытык Күөллээҕи «Чуораанчык» оҕону сайыннарар киин логопед-учуутала.