Өрөспүүбүлүкэтээҕи үөрэх үлэһиттэрин мунньаҕын иитинэн хайаан даҕаны төрөппүттэри умнубат, кинилэргэ анаан туспа кэпсэтии тэрийэр үгэстээхтэр.
“Бары дьиэ кэргэнинэн” төрөппүт мунньаҕын Төрөппүттэр национальнай ассоциацияларын өрөспүүбүлүкэтээҕи холбоһугун эппиэттиир сэкирэтээрэ Семен Иванов салайан ыытта.
Урукку өттүгэр эрдэттэн бэлэмнэммит испииһэгинэн дьон уочаратынан тахсан микрофону былдьаһа-былдьаһа тыл этэр эбит буоллахтарына, быйылгы букатын уратытык ааста. Ол курдук, кыттааччыларга киирэн истэхтэринэ харандаастаах кумааҕылары туттарбыттарынан уйулҕа үлэһитэ дьиэ кэргэннэрин уруһуйдуулларыгар сорудахтаата. Итиэннэ уруһуйдарынан быһаарыы биэрдэ, хайдах уруһуй буоллаҕына болҕомтоҕо ылар ирдэнэрин сүбэлээтэ. Мунньахха хас даҕаны уйулҕа үлэһитэ кэлэн санаатын үллэһиннэ, мустубут дьону сэргэхситэн сэрээккэ оҥоттордо. Ол быыһыгар тэттик сүбэлэри биэрдилэр. Уопсайынан, бу сырыыга тыл этээччилэр буолбакка, уйулҕа үлэһиттэрэ мустубуттара тэрээһини сэргэхситтэ.
Аны төрөппүт мунньаҕар оҕолорун тоҕо соһо сырыттахтарай диэн тус бэйэм маҥнай киирэн баран дьиибэргии санаатым. Онтум эрдэттэн ол курдук толкуйдаммыт эбит, дьиэ кэргэнинэн кытыннылар, тус холобурдарын кэпсээтилэр.
Арассыыйатааҕы ассоциация салайааччыта Алексей Гусев: “Бүтэһик биэс-сэттэ сылга министиэристибэни кытта күүстээх үлэни ыытабыт. Төрөппүттэр кэлэн сүбэ-ама ылаллар, ыйыталаһаллар, Арассыыйа таһымнаах куонкурустары ыытабыт. Төрөппүттэр үөрэхтэрэ педагогическай үлэнэн муҥурданыа суохтаах. Биһиэхэ социальнай сулууспалар, ЗАГС-лар, мэдиссиинэ тэрилтэлэрэ кыттыахтаахтар, оҕо улаатарыгар бэлэм буолуохтаахпыт. Арассыыйаҕа эспиэртэртэринэн бэрэбиэркэлэммит 15 төрөппүт портала баар: “Я — родитель”, “Растим детей.РФ”, “Десятилетие детства”, Оҕо быраабын көмүскүүр киин портала, о.д.а. Онон билигин дириҥ, иһитиннэрэр блок үлэлиир”, — диэн видеонан туһаайыытыгар эттэ.
Биллэн турар, кырыктаах төрөппүттэр эмиэ баалларын, оруна суох араас иирсээннэри таһааралларын, маныаха үлэ көрүҥүн булан сыҕарыйан иһэр, ситиһиилээхтик үлэлиир оскуолалар холобурдарын ылар ордугун ыйда.
Өрөспүүбүлүкэтээҕи психолого-педагогическай арыаллааһын мэтэдиичэскэй киинэ “Төрөппүт эйгэтэ” бырайыак туһунан билиһиннэрдэ. Бырайыак 2022 сылтан үлэлиир, төрөппүттэри төрөппүт буоларга үөрэтэр ис хоһоонноох. Улуустарынан сылдьан олоҕурбут көрүҥүнэн төрөппүттэри кытта көрсөллөр, лиэксийэ ааҕаллар, икки сыл иһигэр барыта 3500-тэн тахса төрөппүтү хаппыттар. Хас сэрэдэ ахсын онлайн холбонон араас исписэлииистэри кытта дьарыктары ыыталлар эбит. Төрөппүттэр быһа холбонон кыттыахтарын сөп диэн иһитиннэрдилэр.
Саха гимназиятын 3-с кылааһын үөрэнээччитэ Андрей Васильев тахсан, учууталын сорудаҕынан чинчийэр үлэҕэ төрүччүтүгэр аналлаах үлэни суруйбутун билиһиннэрдэ. Оннооҕор улахан дьон төрүттэрин үһүс-төрдүс көлүөнэҕэ эрэ диэри билэллэрэ көһүннэ. Оттон бу хас даҕаны көлүөнэтигэр тиийэ үөрэппит, тугунан дьарыктаммыттарын билбит. Быһатын эттэххэ, мунньахха мустубут төрөппүттэри толкуйдатта.
Түмүккэ төрөппүттэргэ сүбэлиир ис хоһоонноох, аҕыйах мүнүүтэлээх видео көрдөрдүлэр, оҕоҕо тапталы, хайҕабылы биллэрэр 99 сүбэлээх брошюраны туттаран ыыттылар.
Муус устар 3 күнүгэр буолбут “Публичнай былаас биир уопсай тиһигэр олохтоох салайыныыны тэрийии уопсай тосхоллорун…
Муус устар 4 күнүгэр, уһулуччулаах судаарыстыбаннай диэйэтэл, Аҕа дойду Улуу сэриитин кыттыылааҕа Гавриил Иосифович Чиряев…
П.Н. уонна Н.Е.Самсоновтар ааттарынан Хатас орто оскуолата “Арассыыйатааҕы Билим академиятын тирэх оскуолата” бырайыакка киирбит уонна…
СӨ Ил Дархана Айсен Николаев уонна "Газпром" ПАУо бырабылыанньатын бэрэссэдээтэлэ Алексей Миллер бигэргэппит "Гааһынан хааччыйыы…
“ВОИН” киин уон, ол иһигэр үс Уһук Илиҥҥи филиал муус устарга үлэлээбиттэрэ биир сылын бэлиэтииллэр.…
Саха тарбахха баттанар биир улахан салайааччыта, бөдөҥ судаарыстыбаннай уонна бэлитиичэскэй диэйэтэлэ, 1965-1982 сс. Сэбиэскэй Сойуус…