БИЭТЭС БИЛЭЭХЭП: “Эрэстэрээҥҥэ биирдэ сылдьарыҥ буоллар…”

Ээ-һэ! Киһи күлэр даҕаны. Бэҕэһээ ыалбыт Ылдьаана киирэн сонун-нуомас бөҕөнү ыһа-тоҕо кэпсээтэ. Ааспыкка эрэстэрээннээбит үһү. Биир уоһунан харчым суох дии-дии ытыыр. Кырдьыгы уот харахха этэр киһи мин инньэ диэтим, утары көрөн олорон. Ылдьаана онно эрэ наадыйбата. Дьэ, кини кэпсээнэ маннык буолла:

— Былыргыттан бодуруунньам хаайан-хаайан эрэстэрээҥҥэ орҕостон бардыбыт. Ону-маны кэпсэтээри, ааспыты- билиҥҥини ахтыһаары. Хата, муусукалара наһаа улахан, киһини дөйүтэр буолбатах эбит. Бастаан киһи аҕыйах курдуга. Дьэ, онтон 9 чаас диэки кэлитэлээтилэр ээ. Биһигиннээҕэр эдэрчи биэс уончалаах дьахталлар сүрдээҕин сөбүлээн сылдьар сирдэрэ буолбут. Бастаан киирэллэригэр син симик соҕустук туттан баран, дьэ, аһаан-сиэн истэхтэрин аайы имнэрэ тэтэрэн, саҥалара хойдон барда. Кэпсэтиилэриттэн иһиттэххэ, нууччалыы-сахалыы булкуйан саҥараллара элбээтэ. Сотору-сотору пиибэ сакаастыыллар, ол аайы эдэркээн эписийээн кыыс төттөрү-таары моҕотой курдук сүүрэкэлиир. Көрдөхпүнэ, олох барар санаалара суох. Онтон уфонча уол кэллэ. “Кыайдыбыт-хоттубут, ураа!”— дэһэллэр. Ол аайы сампаан халлааҥҥа эстэр. Эдэр ыаллар эмиэ эрэстэрээҥҥэ кэлэн киэһээҥҥи аһылыктарын аһыыр буолбуттар. Ити курдук, Ылдьаана бииртэн-биири кэпсээтэ, сөхтө-махтайда.

— Киэһэ аһылыкпын аһыам этэ диэн эрэстэрээнниэ суохпун ээ. Эмээхсиммин мөхтөрбүн даҕаны, кини астаабыт аһа ол тэрилтэ аһынааҕар минньигэс ини, доҕоор. Чэ, баҕар, сылга биирдэ сырыттыннар даҕаны. Нэдиэлэ аайы ити тэрилтэттэн тахсыбат диэн сүрэ да бэрт. “Харчыларын ханна гыныахтарай, сырыттыннар ээ”, — диэтэ мөҕүттэрбин истэн эмээхсиним. Сэрэйдэххэ, кыра үптээх-астаах киһи киирбэт сирэ буолуохтаах. Хаарыан харчыны халтайга куттахтара. Ол кэриэтин ыйдааҕы кирэдьииттэригэр угуо, кимиэхэ эмэ — эмтэнэ барааччыга, элбэх оҕолоохторго эҥин көмөлөһүө этилэр буоллаҕа.

Сотору-сотору биллэрии бөҕө кэлэр эбээт. Онно эмтэнэ барарыгар көмөлөһүҥ, күн-ый буолуҥ диэн. Истэ-истэ абарабын аҕай, ити харчыны көргө-нарга кубулутааччылартан.

Ылдьаана кэпсээниттэн сиэттэрэн, дэлби кыйыттан бараары гыммыппар кыыһым: “Аҕаа, эн эрэстэрээҥҥэ биирдэ сылдьарыҥ буоллар, күн аайы барыаххын баҕарыаҥ этэ”, — диэн өссө кыынньаан биэрдэҕэ үһү.