Эргэ малларынан эргинэр эр киһи дьиэлэри халаабыт

Дьокуускайга Сайсары уокуругар олорор дьахталлар биллибэт киһи дьиэлэригэр киирэн сыаналаах малларын уорбутун туһунан иһитиннэрбиттэр. Бу туһунан СӨ ИДьМ пресс-сулууспата суруйар.

Лонгинов уулуссатыгар баар дьиэҕэ уоруйах түннүгү алдьатан киирбит. Мантан иистэнэр массыынаны уорбут. Оттон Новокарьернай уулуссаҕа баар дьиэттэн сваркалыыр аппарааты ылбыт. Хоромньу холбоон 22 тыһ.солк. тэҥнэспит.

Холуобунай ирдэбил үлэһиттэрэ уорууга эргэ малларынан эргинэр эр киһи сыһыаннааҕын быһаарбыттар.

56 саастаах уорбалааччыны куорат кииниттэн туппуттар. Кини сваркалыыр аппарааты илдьэ сылдьар эбит, оттон иистэнэр массыынаны номнуо атыылыы охсубут. Уоруунан холуобунай дьыала тэрилиннэ.