Эргэ Табаҕаҕа оҕолору түҥнэри көппүт суоппар көҥүлэ быһылынна

Атырдьах ыйын 18 күнүгэр Дьокуускай куорат суута силиэстийэлиир уорганнар көрдөһүүлэринэн, Эргэ Табаҕаҕа оҕолору түҥнэри көппүт суоппары 2 ый болдьоххо, ол эбэтэр бу сыл алтынньы 15 күнүгэр диэри көҥүлүн быһарга быһаарыы ылынна. Бу туһунан иһитиннэрии киин куораттааҕы суут саайтыгар таҕыста.

Санаттахха, атырдьах ыйын 15 күнүн киэһэтигэр Toyota Camry масыына итирик туруктаах суоппара Эргэ Табаҕаҕа киириигэ суол кытыытынан сатыы хааман иһэр сокуоннай сааһын ситэ илик түөрт оҕону түҥнэри көппүтэ. Үс оҕону суһал көмө сулууспата Өрөспүүбүлүкэтээҕи 1-кы нүөмэрдээх балыыһаҕа – Мэдиссиинэ национальнай киинин педиатрия киинигэр киллэрбитэ. Быраастар көрөн баран, икки эмсэҕэлээччини балыыһаҕа киллэрбиттэрэ, биир оҕону тастан эмтэнэргэ ыыппыттара. Кэлин биир оҕо балыыһаҕа суорума суолламмыта.