Эргэ уонна Саҥа Табаҕа маастар-былааннарын оҥороллор

Дьокуускай куорат таһынааҕы нэһилиэнньэлээх пууннар маастар-былааннара Өлүөнэ күргэтин тутууну учуоттаан оҥоһуллар.

Бу туһунан СӨ ситэриилээх былааһын отчуотун кэмигэр иһитиннэрдилэр. Көрсүһүүгэ биир сүрүн боппуруоһунан күргэни тутуу сиригэр киирсэр сир учаастактарын атыылаһыы буолла. СӨ Тырааныспарга уонна суол хаһаайыстыбатын миниистирэ Владимир Сивцев бэлиэтээбитинэн, учаастактар бары ырыынак сыанатынан атыыланыахтара.

«Өлүөнэ күргэтин тутуу — бу көннөрү тырааныспар бырайыага буолбатах, бүтүн территорияны сайыннарыыга күүстээх хамсааһыны киллэрэр. Эргэ уонна Саҥа Табаҕа сайдыыга саҥа кыахтары ылыахтара: инвестициялары тардыы, аччыгый уонна орто биисинэһи сайыннарыы, ол иһигэр туризм уонна өҥө эйгэлэригэр. Биһиги бу сири экэнэмиичэскэй үүнүү кэскиллээх зонатын быһыытынан көрөбүт, онно саҥа үлэ миэстэтэ тахсыа, инфраструктура уонна комфортнай куорат эйгэ аныгы эбийиэктэрэ көстүөхтэрэ», — диэн Владимир Сивцев бэлиэтээтэ.

Манна, Эргэ Табаҕа, чааһынай дьиэ тутуутугар сир учаастактарын аныыр туһунан этии киирдэ. Бу боппуруоһу Сивцев бэлиэтээн туран, бырабыыталыстыба уонна уокурук дьаһалтата үөрэтиэхтэрэ диэтэ. Бу иннинэ биллэринэн, күргэ тутуутугар 153 сир учаастага, ол иһигэр тутуу эбийиэктэрдээх 80-тан тахса уонна 70- тан тахса кураанах учаастактар ылыллыахтара. Өлүөнэ күргэтин дирекцията олохтоохторго анаан консультациялары ыытар.