Эргиччи талааннаах Василиса Винокурова

Саха сирин үтүөлээх этээччитэ Василиса Васильевна Винокурова тохсунньу 22 күнүгэр 85 сааһын туолла.
Аҕа саастаах табаарыспыт билигин да айымньылаахтык ыллыы-туойа, оһуокайдыы сылдьар. Кини Амма улууһун Абаҕа нэһилиэгэр күн сирин көрбүтэ уонна культура идэлээх буолан, кулууп директорынан, фольклор салайааччытынан төрөөбүт улууһугар уонна Орто Халымаҕа кэргэнин дойдутугар үлэлээбитэ. 2009 сылтан куоракка көһөн кэлиэҕиттэн Оһуокай уопсастыба биир көхтөөх чилиэнэ. Тойуксут, чабырҕахсыт уонна саха бэйиэттэрин хоһооннорун өйүттэн ааҕан толорор идэлээх.



Оһуокай уопсастыбатын сэргэ айар талааннаах хоһоонньуттар бөлөхтөрүгэр сылдьар. Тохсунньу 24 күнүгэр оҕолорун, аймахтарын, айар талааннаах доҕотторун ыҥыран, дьоро күнүн бэлиэтээтэ. Аал уоту оттон, айах тутан, айбыт Айыыларбытыттан үтүөнү баҕарда. Оһуокай уопсастыбатын бэрэссэдээтэлэ А.Д.Данилов Дьулуур Хаан аатыттан эҕэрдэ суругу уонна Гиннес рекорда олохтоммут оһуокай хартыынатын бэлэх туттардыбыт. Күндү киһибит уһуннук олор!
Марта Николаева
Сообщить об опечатке
Текст, который будет отправлен нашим редакторам: