Эргиччи туһалаах сайыҥҥы сынньалаҥ

Сайыҥҥы сынньалаҥ кэмигэр Кэбээйи орто оскуолатын үөрэнээччилэрэ араас хайысхалаах лааҕырдарынан хабыллан бэйэлэригэр да үгүһү ылыналлар, нэһилиэк олоҕор-дьаһаҕар да кыттыһаллар.

Ол курдук «Кэрэ эйгэ» оскуолатын (дириэктэр М.П. Сметанина) иһинэн тэриллибит лааҕырга үҥкүү этэрээтин В.Н. Лугинова, А.Н. Харлампьева салайан үлэлэтэллэр. Манна үҥкүү алыбыгар ылларбыт 30 оҕо күн аайы дьарыктаналлар. Онтон ДПИ этэрээтигэр 20 оҕо сылдьар. Бу салааҕа М.И. Аргунова уонна И.А. Обутова оҕолору илиинэн туттуу кистэлэҥэр уһуйаллар.

Онтон «АРАЛ» олоҥхо этэрээтигэр ытык Таатта сириттэн Саха сирин биллиилээх олоҥхоһуттара «Удьурҕай» бөлөх салайааччыта Р.С. Маркова уонна Өймөкөөн Олоҥхо Ыһыаҕын Кылаан Кыайыылааҕа А.Н. Николаев  айымньылаахтык үлэлэһэ сылдьаллар. Олоҥхо алыптаах эйгэтигэр 50-ча араас саастаах оҕо дьарыктанар.

Лааҕыр үлэтин бастакы сезона бэс ыйын 6 күнүттэн саҕаламмыта. 20-чэ күн устата бу араас хайысханан хабыллыбыт оҕолор бириэмэлэрин туһалаахтык атаараллара саарбаҕа суох.

Кэбээйигэ ыытыллаары турар улуус ыһыаҕар олоҥхоҕо, үҥкүүгэ дьарыктаммыт оҕолор 20 күннээх үлэлэрин түмүгүнэн ыһыаҕы киэргэтиэхтэрэ, сэҥээриини ылыахтара диэн бүк эрэнэбит.

Лааҕыр аһыллыытын үөрүүлээх түгэнэ орто оскуола тэлгэһэтигэр бэс ыйын 13 күнүгэр тэриллэн ыытылынна.

Манна даҕатан эттэххэ, бу үлэ-хамнас барыта Өрөспүүбүлүкэтээҕи Олоҥхо ыһыаҕар бэлэмнэнии чэрчитинэн ыытылла турар. Улуус салалтата кэмигэр сөптөөх дьаһалы ылбыта сэҥээриилээх.

 

Татьяна Максимова-Лазарева