Өргүөттэр аҕам саастаахтары мууһунан хааччыйдылар

Үөһээ Бүлүүгэ Өргүөт нэһилиэгин баһылыга Андрей Николаев көҕүлээһининэн,  эр дьон түмсүүтэ үтүө үгэс сиэринэн, сыллата соҕотох ийэлэргэ, аҕам саастаах ытык кырдьаҕастарга  муус киллэрэн биэрэннэр, нэһилиэк дьоно үөрүүбүт үксээн олорор диэн Анисия Ильина иһитиннэрдэ.

— Дойдубут эр хоһууттара туора туран хаалбакка, бары биир киһи курдук күргүөмнээхтик кэлэн,  күүстээх үлэ барда. Өргүөттэн төрүттээх ыччаттарбыт төһө да ыраах олордоллор, бэнсиин, харчы ыытан, күүс-көмө буоллулар.
Олохтоох дьаһалта уонна кулууп коллектива үтүө санаалаах эр дьоммутун сылаас аһынан хааччыйдылар. Маннык үтүө дьыалаҕыт сүүс төгүл үтүөнэн эргийдин, — диэн улуус дьаһалтатын пресс-сулууспатыгар Анисия Ильина кэпсээтэ.