Эрхаан «Эр хоһуун хотойбут» диэн саҥа килиибэ таҕыста

Саха эстрадатын ырыаһыта  Эрхаан олунньу, кулун тутар ыйдарга  байыаннай дьайыыга сылдьар уолаттарга тиийэн кэнсиэртээн, волонтердаан  биир дойдулаахтарбытын улаханнык сэргэхситэн тураллар.

Байыаннай дьайыы сириттэн кэлээт, Эрхаан байыаннай дьайыыга сылдьар уолаттарга анаан «Эр хоһуун хотойбут» диэн саҥа ырыатын сүрэхтээтэ. Бу туһунан ырыаһыт:

Москваҕа постпредствоҕа сылдьыбыппар, миэхэ «Саха сирэ» хаһыат таһаарбыт «Эргиллиҥ кыайыы көтөллөөх» диэн хоһоон хомуурунньугун бэлэхтээбиттэрэ. Бу кинигэҕэ өрөспүүбүлүкэ араас хоһоонньуттарын хоһоонноро киирбиттэр этэ. Мин бу хомуурунньуктан түөрт хоһооҥҥо ырыа айбытым. Байыаннай дьайыыга сылдьар уолаттарбытыгар анаан Маргарита Егорова диэн Ньурба улууһун Чуукаар нэһилиэгин олохтооҕун «Эр хоһуун хотойбут» хоһоонугар ырыа айан баран били бэйэм суруйбут хос ырыабын эбэн биэрдим, — диэн биһиги саайпытыгар санаатын үллэстибитэ.