Салгыы
Эрилик Эристииҥҥэ аналлаах испэктээккэ биир дойдулаахтара көмөлөспүттэрэ

Эрилик Эристииҥҥэ аналлаах испэктээккэ биир дойдулаахтара көмөлөспүттэрэ

24.01.2023, 13:03
Бөлөххө киир:

1892 сыл тохсунньу 24 күнүгэр  суруйааччы, драматург, ССРС Суруйааччыларын сойууһун чилиэнэ, Саха сиригэр гражданскай сэрии кыттыылааҕа  Семен Степанович Яковлев-Эрилик Эристиин  күн сирин көрбүтэ.

Кини Чурапчы (Боотурускай) улууһун   Чакыр нэһилиэгэр төрөөбүтэ.  Оҕо сааһыттан  баайдарга  хамначчыттаабыта, онтон  Ленскэйдээҕи көмүс бириискэтигэр   оробуочайдаабыта.  Саха сиригэр сэбиэскэй былаас бигэргэниитигэр көхтөөхтүк кыттыбыта.  1922 сыллаахха Дьокуускай куоракка типографияҕа наборщигынан үлэҕэ киирбитэ. Төрөөбүт оройуонугар араас салайар дуоһунаска сылдьыбыта.

1923 сылтан бэчээттэнэн барбыта.  “Чолбон” сурунаалга  улуус өрөбөлүүссүйэ иннинээҕи олоҕун кэпсиир  “Соһуччу үөрүү” диэн бастакы  сэһэнэ тахсыбыта.   1930-с сылларга бэчээттэммит улахан айымньыларыгар   саҥа кэм киһитин майгыта-сигилитэ уларыйыытын көрдөрбүтэ.  1934-35 сылларга  Бурятияҕа, Казахстаҥҥа, Москваҕа уонна Ленинградка айар командировкаларга сылдьыбыта.  Манна хомуйбут матырыйаалларыгар олоҕуран,   “Революция уолаттара”, “Аймалҕан” сэһэннэрин суруйбута.  Кинигэ үгүс айымньылара  гражданскай сэриигэ анаммыттара.

Төһө да көрөр хараҕын букатыннаахтык сүтэрдэр, “Маарыкчаан ыччаттара” арамаанын түмүктээбитэ.

Ону таһынан “Суорума соруктаммыт”, “Биэлэй ыстааба”, “Манчаары Баһылай” уо.д.а. пьесалары суруйбута. Эрилик Эристиин — олоҥхоһут-суруйааччы,  «Буура Дохсун», «Айыы Дьөһүөл», «Харалаах Мохсоҕол», «Талыы талба бухатыыр» олоҥхолор ааптардара.

Эрилик Эристиин өлбүтүн кэннэ  Саха сирин хомсомуолун аатынан бириэмийэ иҥэриллибитэ.

Суруйааччы төрөөбүт нэһилиэгэр Чакырга киниэхэ аналлаах Мусуой-дьиэ үлэлиир.

2022 сыл кулун тутар 11 күнүгэр  Былатыан Ойуунускай аатынан Саха академическай тыйаатыра “Маарыкчаан ыччаттара” арамаантан “Төлөннөөх сүрэхтэр” диэн  бастакы түһүмэх-испэктээги туруорбута. Режиссер Сергей Потапов туруорбут испэктээгэ САССР 100 сылыгар уонна  Саха сиригэр арамааны бастакынан ылсыбыт суруйааччы Эрилик Эристиин төрөөбүтэ 130 сылыгар анаммыта. Испэктээк көрөөччүгэ тиийэригэр улахан өйөбүлү Чурапчы улууһун дьаһалтата уонна олохтоохтор оҥорбуттара.

Бүгүн, тохсунньу 24 күнүгэр,  Саха тыйаатырыгар  Эрилик Эристиин төрөөбүтэ 130 сылын үбүлүөйдээх сылын түмүктүүр уонна революционер Г.С. Яковлев-Кыра Хабырыыс төрөөбүтэ 130 сылыгар аналлаах «Олох икки үөрэх икки биир кииннээхтэр» дьоро киэһэ буолар. Эрилик Эристиин тутта сылдьыбыт малларын, Чакыр  уустарын уонна иистэнньэҥнэрин оҥоһуктарын быыстапката тэриллиэҕэ. Бу күн  Олоҥхо тыйаатырын артыыската Анастасия Алексеева, кини балта Сайаана Попова, бииргэ төрөөбүт Нарыйаана, Туйгууна, Чэмэлиинэ Павловалар кыттыахтара.  Онтон 6 чаастан суруйааччы   «Маарыкчаан ыччаттара» арамаанынан испэктээк буолуоҕа.

Лента
Салгыы
31 января
  • -46°C
  • Ощущается: -46°Влажность: 65% Скорость ветра: 0 м/с

Сообщить об опечатке

Текст, который будет отправлен нашим редакторам: