Эрнст Алексеевка анаммыт саҥа искибиэр

Бүгүн, от ыйын 17 күнүгэр, Таатта улууһун Туора Күөл нэһилиэгэр,  норуот маастара, П.А.Ойуунускай аатынан СӨ Судаарыстыбаннай бириэмийэ лауреата, Таатта улууһун уонна Дьүлэй нэһилиэгин бочуоттаах олохтооҕо, ытык киһи  Эрнст Александрович Алексеев сырдык кэриэһигэр саҥа искибиэр аһыллыыта буолла.

Эрнст Алексеев өрөспүүбүлүкэҕэ биллэр үгүс тутуулар, саха мындыр тутуутун туһунан үйэлээх үлэлэр ааптардара буолар.

Кини олорон ааспыт сырдык олоҕун, кэнчээри ыччакка айан-тутан хаалларбыт үлэтин-хамнаһын туоһулуур искибиэри оҥорууга бииргэ төрөөбүт балта Изабелла Александровна Павлова сүҥкэн оруоллаах.

Изабелла Александровна Павлова:

— Убайбынаан алын сүһүөх кылааска диэри бииргэ атахтаһа сытан утуйар күндү, чугас киһим этэ. Убайбын батыһан манна, ыраах Ньурба улууһуттан көһөн кэлэн ыал буолан олохсуйан Таатта Туора Күөлүн дойду оҥостубуппут. Убайым барахсан былырыын олохтон барбыта. Кини сырдык аатын үйэтитэр туһуттан искибиэр оҥорор туһунан толкуй киирбитэ. Саас хаардаахха ханна оҥоруохха сөбүн туһунан санаан, бырайыагын толкуйдаан саҕалаабытым. Миэстэ көрөн дьон кэлэ-бара сынньанар сирэ буолуон баҕарбытым. Бырайыакпын кэргэним Афанасий Николаевич өйөөн  оҥордубут. Күрүөтэ мас буоллаҕына кэбирэх буолуо диэн тимиринэн сыбааркалатан оҥоттордубут. Бырайыакпытын нэһилиэкпит баһылыга Олег Дмитриевич Осипов, күтүөппүт Ханин Александр Михайлович өйөөннөр, кинилэр көмөлөрүнэн олоххо киирдэ. Матырыйаалларын барытын кинилэр булан биэрбиттэрэ. Сыбаарка үлэтин Геннадий Захаров уолбунаан Николай Павловтыын оҥорбуттара. Кинилэргэ Александр Николаевич Бережнев көмөлөспүтэ. Ис өттүн барытын маһынан оҥордубут. Чупров Петр Романович ыскамыайкалары оҥорууга күүс-көмө бөҕө буолбута. Убайым уопсайа тоҕус кинигэлээх. Онон ити кинигэлэрин таһааттаран искибиэр тулатыгар туруордубут. Күүс-көмө буолбут бар дьоммутугар улахан махталбытын тиэрдэбит. Өссө элбэх маһы олордуохпут, ону таһынан төрөөбүт дойдубутуттан Ньурба Маалыкайыттан мас аҕалыллыахтаах. Онон убайым сырдык аатын үйэтитиигэ ытык иэспин төлөөтүм диэн үөрэн олоробун.

Эрнст Алексеев олоҕун аргыһа Светлана Тимофеевна Алексеева:

-Олоҕум доҕоро Эрнст Александрович аатыгар бииргэ төрөөбүт балта Изабелла Александровна идиэйэтинэн, тэрийиитинэн, киниэхэ аналлаах искибиэр астыбыт. Чугас дьоммор, бар дьоммор ис сүрэхпиттэн махталбын биллэрэбин. Кэргэним, аҕабыт Эрнст Александрович Таатта Дьүлэйин дойду оҥостон айа-тута үлэлээбитэ. Биир дойдулаахтара ньурбалар аҕабытын Тааттаны дойду оҥостубуккун дииллэрэ. Чахчыта да оннук. Ис сүрэҕиттэн Таатта киһитэ буолбута. Искибиэр аһыллыбытыттан, аҕабыт аата үйэтитиллибититтэн наһаа үөрдүм, долгуйдум.

Иванна Эрнстовна Оросина, төрөппүт кыыһа:

-Аҕам туһунан өйдөбүл олус истиҥ буолар. Аҕабыт дьоҥҥо олус истиҥ сыһыаннаах, наһаа сымнаҕас майгылаах киһи этэ. Айар үлэтигэр олус бэриниилээҕэ. Өссө да элбэҕи айар-тутар былааннааҕа. Тааттаны төрөөбүт дойдутун курдук таптаан олорбута. Ийэбинээн олус истиҥ сыһыаннаахтара, 50 тахса сыл бииргэ эйэ-дэмнээхтик олорбуттара. Аҕам миэхэ кылаас салайааччыта буолан оскуоланы кини салалтатынан бүтэрбиппит. Уһун сылларга оскуола дириэктэринэн үлэлээн, ону сэргэ өрөспүүбүлүкэҕэ үгүс улахан суолталаах тутуулары тутан, элбэх кинигэни суруйан кэнэҕэски ыччакка кэриэс-хомуруос гына хаалларбыта үйэлээх үлэ буолар.

Сайыҥҥы куйаас күн Эрнст Алексеев хаартыскалаах стелатын төрөппүт оҕолоро, кыргыттара Лилиана, Иванна Эрнстовналар арыйыахтарын иннинэ, сөрүүн тыал сайа охсон маҥан сабыыны арыйбыта соһуччу буолла. Ол курдук ытык киһи Эрнст Александрович өрөспүүбүлүкэ сайдыытыгар, саха былыргы тутуутун үйэтитиигэ анаабыт сырата, айан-тутан хаалларбыт дьоһун, улахан суолталаах үлэтэ-хамнаһа бар дьоҥҥо үтүө өйдөбүл буолуоҕа.