Өртөөһүнү ыытыыга бобуу баарын санаттылар

Куурбут-хаппыт оту-маһы уматыы үгүстүк сир-уот уонна ойуур баһаардарыгар тиэрдэр. Ол эрээри күн бүгүҥҥэ диэри өрөспүүбүлүкэ олохтоохторо маны көҥүллээһини туруорсаллар, диэн өрөспүүбүлүкэ бастакы вице-премьерэ Дмитрий Садовников  баһаартан кутталлаах сезоҥҥа бэлэмнэниигэ суһал штаб мунньаҕар иһитиннэрдэ.

Дмитрий Садовников өртөөһүн өссө дойдуга 2015 сыллаахха бобуллубутун санатта уонна нэһилиэнньэҕэ өйдөтүүнү күүһүрдэргэ эттэ. Кини этэринэн, сыл ахсын баһаар туруута саҕаланнаҕына эрэгийиэн сиригэр-уотугар өртөөһүнтэн  уот туруута элбэхтик бэлиэтэнэр. Бырабыыталыстыба отчуотугар бу боппуруоһу олохтоохтор үгүстүк туруораллар.

Сэтиэнэҕи сэрэтэр уматыыны ойуур пуондатын сиригэр анал биэдэмистибэ исписэлиистэрэ судаарыстыба сорудаҕын чэрчитинэн эрэ ыыталлар, ону муниципалитеттар сайаапкаларынан чопчулууллар. Маны исписэлиистэр күһүн, халлаан тымныйбытын уонна сииктээх эрдэҕинэ, уот тыаҕа тахсыбат кэмигэр ыыталлар.

Оту уматыыны “Якутлесресурс” тэрилтэ үөрэммит, сайын ойуур баһаарын умулларыыга кыттыбыт исписэлиистэрэ ыыталлар. Кинилэр уот умайан бүтүөр диэри кэтииллэр.. Маныаха уопуттаах үлэһиттэр кытталлар.

Былырыын хаар түһүөр диэри сэтиэнэх оту уматыыга эрэгийиэн 16 лесничествота кыттыбыта: Амма, Үөһээ Бүлүү, Дьааҥы, Бүлүү, Горнай, Индигир, Нам, Ньурба, Өлүөхүмэ, Сангаар, Сунтаар, Таатта, Уус-Алдан, Уус-Маайа, Хаҥалас, Чурапчы. Лесничестволарга 300-тэн 600 гектарга диэри иэннээх сири, өрөспүүбүлүкэ үрдүнэн 6,6 тыһ гектары уматыллар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата