Өрүс мууһугар түспүт сөмөлүөт: Быһылааны чинчийии саҕаланна

️Ахсынньы 28 күнүгэр Дьокуускай-Зырянка-Орто Халыма маршрутунан көтөн испит Ан-24 сөмөлүөт Зырянка аэропуордугар буолбакка, Халыма өрүс мууһугар түһэргэ күһэллибитэ. 

Сөмөлүөккэ 30 пассажир уонна 4 экипаж чилиэнэ бааллара. Эчэйбит киһи суох, сөмөлүөт эмиэ эмсэҕэлээбэтэ. Бу быһылаан түмүгүнэн, «Росавиация» управлениета бэрэбиэркэни  ыытар.

Бүгүн Зырянкаҕа «Полярные авиалинии» хампаанньа сөмөлүөтэ көттө. Бу сөмөлүөтүнэн быһылаан төрүөтүн быһаарарга уонна бастакы дьайыылары оҥорорго хамыыһыйа чилиэннэрин уонна инженернэй-авиационнай сулууспа, көтүү куттала суох буолуутун хааччыйар иниспиэксийэ исписэлиистэрэ көттүлэр.

«Полярные авиалинии» бу быһылааны чинчийэргэ бары өттүнэн көмөнү оҥорор диэн хампаанньа пресс-сулууспата иһитиннэрэр. «Көтүү куттала суох буолуутун хааччыйыы — үлэбит сүрүн оҥкула» диэн пресс-релизкэ этиллэр. Чинчийии бүппүтүн кэннэ, миэрэлэр ылыллыахтара диэн иһитиннэрэллэр.

Билигини «»Полярные авиалинии» хампаанньа урукку эрэсииминэн үлэлиир, оройуоннарга пассажирдары таһыы тохтообот.