Быйылгы навигация тоҕус хонук эрдэлээтэ

Быйыл Өлүөнэтээҕи холбоһуктаах өрүс пароходствота Саха сирин өрүстэригэр  2025 сыллаах навигация сезонун эрдэлээн аста.

Ол курдук, муус устар 30 күнүгэр, тэрилтэ дьиэтин үрдүгэр навигационнай вымпелы көтөхтүлэр. Быйыл навигация былырыыҥҥытааҕар тоҕус күнүнэн  эрдэ аһылынна. Төрүөтэ — Осетрово пуордуттан бастакы суудуна уунан сырыыта номнуо саҕаланна. ЛОРП ПАУо генеральнай дириэктэрэ Сергей Ларионов пароходство үрдүкү салалтата кыттыылаах үөрүүлээх тэрээһиҥҥэ вымпел көтөҕөргө хамаанда биэрдэ.

Быйылгы навигацияҕа саҥа сүүрээн киирдэ – тэрилтэҕэ Пассажирдары тиэйии уонна туризм сулууспата тэриллиннэ. Быйыл  «Демьян Беднай» уонна «Михаил Светлов» теплоходтар туристары араас хайысхаларынан хото таһыахтара. Саҥа сулууспаны туризм эйгэтигэр уопуттаах идэтийбит исписэлиис Дмитрий Громов салайар.