Өрүскэ тимирбит тыраахтар дьоно быыһамматылар

Ахсынньы 12 күнүгэр Дьокуускайтан 10-12 килэмиэтирдээх сиргэ, Төхтүр уонна Пономарев диэн арыы икки ардынан Өлүөнэ өрүскэ «Беларусь» тыраахтар тимирдэ. Тыраахтарга икки киһи баара кыайан тахсыбатахтар диэн Ыксаллаах быһыы-майгы сулууспата иһитиннэрэр.

Түспүт сирдэригэр муус халыҥа баара-суоҕа 15 см эбит. Өр кэмҥэ сылаас турбут буолан, муус сорох сиринэн олус чараас. Быыһааччылар, водолазтар күн сырдыгын баттаһа тыраахтар иһиттэн дьону таһаарарга үлэлээтилэр. Ол эрээри, дьон өлүктэрин булбатылар.

Тыраахтар үөһээ өттүнэн люк аһыллыбыт эбит. Тырахтарыыс уонна пассажира люгу аһан баран, тахса сатаабыттар да, бу сиринэн күүстээх сүүрүктээх буолан, муус аннынан баран хаалбыттар. Водолаз тыраахтар иһигэр куурканы эрэ булбут. Тыраахтар 6 миэтэрэ дириҥҥэ сытар.

Ону тэҥэ, ГИБДД, ГИМС иниспиэктэрдэрэ, Мэҥэ Хаҥалас улууһун дьаһалтатын бэрэстэбиитэллэрэ уонна силиэстийэлиир-оперативнай бөлөх үлэлээтилэр.

Ахсынньы 11 күнүттэн Дьокуускай аттынан Хатас-Төхтүр хайысхатынан эрэ өрүһү туоруур  көҥүллэммитэ. Онно ууну кутан  суолу халыҥаппыттара. Мууска 3 туоннаттан улахана суох ыйааһыннаах кыра массыыналар эрэ сылдьаллара көҥүллэнэр.