Өскөтүн, дьиэ истиэнэтин көҥүлэ суох көтүрэр буоллахтарына…

Дьокуускай куорат элбэх кыбартыыралаах саҥа дьиэтигэр өрөмүөн күөстүү оргуйар. Сорохтор номнуо өрөмүөннэнэн бүтэн киирэ охсон саҥа дьыл сүпсүлгэнигэр түһэллэр.

Саҥа дьиэҕэ быйыл ипотеканан кыбартыыра атыыласпыт Мария Петровна суруйар:

-Мин төрдүс этээскэ олоробун. Үрдүнээҕи кыбартыыра тохтоло суох тугу эрэ эрбиир, үүттүүр, көтүрэр тыаһа киэһэ хойукка диэри тыаһыыр. Мин саныахпар, арааһа көтүллүө суохтаах тутаах истиэнэни көтүрэн, кыбартыыра былаанын уларытан эрэллэр, — диэн кэпсиир. Маннык кыһалҕаҕа ким баҕарар түбэһиэн сөп.

Биһиги бу туһунан сиһилии билсээри СӨ тутуу нодзуорун управлениетын салайааччы Павел Анатольевич Аргуновка сибээскэ таҕыстыбыт:

— Билигин маннык кыһалҕа үөскээтэҕинэ, олохтоохтор Дьокуускай куорат дьаһалтатын иһинэн дьиэ-уот сыһыаннаһыытын департаменыгар, ону сэргэ салайар хампаанньаҕа үҥсүү түһэриэхтэрин сөп. Дьиэни тутар сүрүн истиэнэлэри, вентиляция хоруобун көтүрэр көҥүллэммэт. Ыаллыы олорор кыбартыыраттан сылтаан атын дьон эмсэҕэлиэ суохтаах, — диэн хоруйдаата.

Биһиги бу боппуруоһу быһаарар туһуттан салайар хампаанньаҕа эрийэн сурастыбыт. Онуоха маннык кыһалҕаламмыт киһи дьиэтин сыһыарыылаах салайар хампаанньатын юридическай салаатыгар сайаапка түһэрэр, ону сэргэ дьиэни туппут тэрилтэҕэ суругунан үҥсүү түһэриэн сөп диэтилэр.

Бэлиэтээн суруйдахха, атын дьон суотугар кыбартыыраны кэҥэтэн истиэнэни көтүрүү сокуонунан көҥүллэммэт. Өскөтүн, саҥа атыыласпыт кыбартыыраҕар маннык балаһыанньа үөскээтэҕинэ, эн соҕотох буолбатаххын!